Кьилиз акъуд хьанач чавай чи ашкъи,
Рекъин зурни фенач,хуьтягь хьана ам.
Вучиз хьана,нивай хьана-чидач хьи,
Са чида заз,фад алахьна кана ам.
Гьар легьзеда зенгер ийиз,хабар кьаз,
Са-садавай кефер-гьалар жузадай.
Хьанайтlа мад акун тийиз са юкъуз,
Тешвиш хьана,руьгь цкlидай сузадай.
Сад лагьана вуч хьана бес чаз гила,
Варцарални ахквазамач сад садаз.
Дуьшуьш хьана къефилдай вил акьурла,
Килигзава саки на са чарадаз.
Вун акурла зи гьиссерни юзазмач.
Мягьтел я зун,гьиниз фена кlанивал.
Эвелрин а гьевесарни заз амач,
Хьанатlа зун рикяй ашукь,яни вал?
Хуьтягь хьана ашкъи,гелни амукьнач,
Икьван регьят къайи хьунар жеда жал?
Лагьайтlани рикlик затlни кмукьнач-
Са бушлухди гузва гила сефилвал.
19.09.15 г.
Фад хьайи ашкъ
© Copyright: Намик Фарзалиев, 2016
Свидетельство о публикации №116072602474
Свидетельство о публикации №116072602474
Рецензии