Вядерин бягьс

Гатфар,гад.зул,кьуьд санал
Дуьшуьш хьана са юкъуз.
Гьатна кlеви бягьсина,
Сада садаз гаф тагуз.

Куьд рахана:"Эфзелди,
Вядерикай,зун я,зун.
Зун я чилиз герекди,
Вуч гатфар,вуч гад,вуч зул!?"

"Зи магьсулар незава,
Элкъвей йисуз инсанри,-
Лугьуз зулу,акъвазна,-
Зун я квелай хъсанди."

Гатфар хъуьрена адал,
Лугьуз:"И рахун вуч я,
Зун тахьайтlа дуьньядал,
Магьсул жедан,вун вуж я?"

Гад рахана:"Акъваз куьн,
Зи а чими гьаваяр
Галачиз,куь и луькlуьн
Буш гафар я,гьаваян"...

Абур,гьуьжетаз гзаф,
Атанач са къарардал.
Атlуз сада садан гаф,
Йиф вегьена кьуларлай.

Икl акуна,хъуьтlуьни,
Эвягъна лацу чуьруь.
Рехъ акъудиз кьетlени-
Авуна сугьбет куьруь:

"Шикилдаваз инсанрин,
Фида,мензил атlуда.
Гьим я чакай хъсанди-
Гьакlа чна кьатlуда."

Гатфарни,гадни,зулни
Рази жеда лагьайдал.
Чеб инсан хьиз гьазурна,
Мензил атlуз,рехъ гьалда.

Са шумуд югъ рехъ фида,
Атlуз тlамар,талаяр.
Абруз вацlа эхъизвай,
Дуьшуьш жеда,аялар.

Мукьуз хьана аялриз,
Абру вичин суална.
Жаваб гана гьарайиз,-
"Гад,гад",-вириди санлай.

Рехъ фена мад юлдашар,
Акъатна са межлисдиз.
Мярека тир-из ашар,
Халкьар тир шадвилериз.

Межлисдавай жузана,-
"Вуч шадлухар я",-лугьуз.
"Ци бегьерар бул хьана,
Им кьурбандар я зулуз."

Вядериз акуна и кар,
Мярекадай акъатна.
Гад,зул,кьуьд,садни гатфар,
Мадни физ рекъе гьатна.

Рехъ са хуьруьз аватна,
Кимел ацlукьнавай эл.
Яб акализ агатна,
Бягьс чlугузвай кьуд женжел.

Никеркай тир рахунар,
Тир сугьбетар цанрикай.
Живерин икl геж къунар-
Чилиз зиян хьунрикай...

Хъуьтlуь хъверна са масан,
Вичин чуьруь агъуриз.
Лагьана:"Идлай хъсан
Жедач субут жагъуриз."

Вахт квадарнач суракьдиз,
Рекъиз давам хъавуна.
Фена абур са багъдиз-
Ихьтин шикил акуна:

Жегьил гада,ийер руш-
Цуькер кузва алугна.
Бахтлувилелди,чин хуш,
Кушкушзава илигна.

Хъуьрена гатфарни акl,
Лагьана пуд дустуниз:
"Чи бягьсер я буш,нагьакь-
Герек амач жузуниз..."

А югъ и югъ дуст хьана,
Мад гьуьжетар хъавунач.
Вичел гьалтдай кlвалахар,
Гьарма сада авуна...

...Вуч я лугьун несигьат,
Вуч нетижа акъатда?
Гьар вяде-са гьадиса,
Гьардав чи кар агатда.

Алахъурла са кардал,
Лугьуз тахьуй пис-хъсан.
Вядедиз ва чкадал,
Гьар са кlвалах я асант...

17.01.16.