Зи хциз

 

Чан хва,гьик хьи,гьар са тарциз
Дувул жеда,хел жеда.
Гьар инсандиз вичин тlварциз
Лайих уьмуьр,гел жеда.

Хъсандиз яб акала захъ,
Илимрин на гъил кlевиз яхъ,
Гужлувалин садлай яракь
Камаллу тир пел жеда.

Рахаз тахьуй вун гьавайда,
Авай гаф лагь вуч лагьайтlа,
Фикирмир хьи,дуьз рахайтlа
Са вуж ятlан хъел жеда.

Чир хьухь чlехиз,чир хьухь гъвечlиз,
Къамир са кар чизни-течиз,
Далу гумир гьар са кициз-
Ваз арха тек эл жеда.

Мехъер лумир чарад ясдиз,
Тахьуй дуьньяд мал на кьасдиз.
Дустни лагь хьи,ахьтин касдиз,
Адан факни кьел жеда.

Дуст-душман чир тахьайбурин,
Намертриз гъил вугайбурин,
Агьилриз яб тагайбурин
Югъни,йифни шел жеда.

Икьрарлу хьухь хайи чlалаз,
Ам са къизил,ам са алмас,
Дидедин чlал чизватlа ваз
Дидед рикlни кlел жеда.

Кlан хьухь жуван хайи ватан,
Мукьал ятlан,яргъал ятlан.
Дарвилери гьатай заман
Элдин куьмек мел жеда.

Гужлу я халкь сад хьайила,
Гъуд я,тупlар вад хьайила.
Архарин яд кlватl хьайила
Вацар хьана сел жеда.

"Бахтар кlанда",-луз акъвазмир,
Залан кlвалахриз на назмир.
Са ибледални таразмир-
Кьар тежедай кел жеда.

Рахадач зун мадни гзаф,
Хъулгьун за ваз чан хва са гаф,
Тахьайтlа вун гафун сарраф
Ви мез ваз энгел жеда.