Къе за ярдиз темен гана,
Заз женнетдин дад акуна.
Гьижранд мурк1ар къе ц1рана
Зи бедендиз гад акуна.
Зи рик1икай хьана са дагъ,
Ярдин чинал акурла рагъ,
Адан къужах няметрин багъ
Заз зи рик1ин пад акуна.
Килигзавай заз дат1ана,
Зи рик1евай ашкъ кьат1ана,
Вилериз зи нур атана,
Заз марвардин хад акуна.
Мич1и йифин мич1 иер я,
Хъуьрезвайбур чаз гъетер я,
Са арадлай югъ эквер я
Гьайиф хьи рагъ фад акуна.
Алк1ана зун ярдал к1евиз,
Хьанач завай к1вализ хъфиз,
Кьве рик1 санал ифиз-ифиз
Шагьмарданаз сад акуна.
Къе за ярдиз темен гана
© Copyright: Шахмардан Арран, 2016
Свидетельство о публикации №116062703105
Свидетельство о публикации №116062703105
Рецензии