Инсан я жавабдар...

Цавари халкьнава и дуьнья битав.
Гьар са затl алайд я вичин чкадал.
Зунжур хьиз галкlанва вири сад-садав,
Гьар са гьалкъад адан,вичин кар кьада.

Гьар шииз дуьньяда са мана ава,
Гьар сада вичин роль къугъвазвайди я.
Чилерал цекврезни везифа ала,
Ветlрез вичин метлеб авазвайди я.

Са гъвечlи уьмуьр я чепелукьдинзи,
Чиз-чиз хьи,куда,ам къведа ишигъдал.
Кьиникь диривилин,жеди,туш акси-
Сад кьейтlа,са вучтlа яшамишда жал!?

Рагъузни,гарузни вичин къаст ава,
Гьуьлуьни гьаваян гузвайд туш лепе.
Циферни метлебсуз жедач хьи,цава,
Нвакьвариз герек я фитедин пепе.

Вилиз такваз хьайтlа,кьатlузва кьили,
Гьар шеъ мантикълу я-ачух я хелвет.
Инсани азад туш вич-вичиз,тlили,
Амни и зунжурдин гьалкъа я гьелбет.

Гьар са затl квазва вичин тайинрик,
Гьар шии ийизва гьалтнавай кlвалах.
Тек са инсанар я,кваз уюнрик,
Кlанда хьи,тебиат хьуй вичин чlалахъ.

Адетдин тегьердай акъатунизни,
Са рехъ авайди я-гъвечlи я чlехи.
Дегишвал авунрихъ агатунизни,
Хьана хьиз,хъсан я,маналу эхир.

Инсан я жавабдар и чи дуьньядиз,
Ам я туькуьруьнрин кьакьан дережа.
Са амал тавурай кьатlунтиз,тадиз,
Я Аллагь,акьулни адаз це жува.