Дидед чlал

Ингилис,франсуз,немес я урус,
Италян,испан чlал,чавуд я хьинди...
Герек жедач абур-лугьун туш тlурус,
Амма заз зи хайи чlал я ширинди.

Жагьада,лугьудай инсанарни,заз,
Кlваляй экьечlнани-герек жедач жал.
Чуьлда вун рахада адал нигалаз?
Са чlехи улубни авач ви чlалал...

Абурни дуьз я кьван икl килигайла,
Вуч лугьун за гила "дугъри" гафариз?
Са урус зи кlвализ мугьман атайла,
Жузурла,вуч лугьун бес за афарриз?

Испандал,чавуддал вуч лугьун тlачиз?
Хешилдиз вуч лугьун бес за Дубайда?
Парижда гъвечlи мих акъахда кlвачиз,
"Вай,чан диде",-лугьуз чна гьарайда.

Акуна са сефер,вил ацlакьнавай,
Лезги таватдиз "I love you",-лугьудан?
Ам бес и зи рикlин ялав,цlай квай,
Ашкъидин гафар,дуьз гъавурда кьадан?

"Килига зи виляй",-лугьун за абруз,
Хайи чlал аватlа,ава заз ван-сес.
Яргъал уьлкейраваз,гъариб сятриз,
Зун зи руьгьдихъ галаз гьикl рахада бес?

Экъвена,дуьньяяр,кlвачал(а) авуна,
Хтайла,кlан жеда экъве дагълара.
Хайи чlал тахьайтlа,вучда кьван чна?
Гьин чlалал ван твада чlулав рагара?

...Гьиниз зун фейитlан,гьина зун хьайтlан,
Ама гел,Ватандин гьар са жигъирда.
Мажбур яз,маса чlал гьина рахайтlан,
Лезгидал,лугьудай гафар,жагъурда.

Сейли тахьайтlани,кесиб ятlани,
Дидедин ни гуда хайи чlала заз.
Дуьньядин чlалар заз,вири гайтlани,
Жуван чlал,жедач зун,абрухъ дегишаз.

02.09.2015 г.