Буба

Шадвилелди жемятди
Тумар цазва талада,
Гьазур жезва тIебиат
Гьахьиз хъуьтIуьн чилада.

Ван ацалтна кIвахьзава
Пешер-хъипи якъутар,
Зулун цава къекъвезва
Девеяр хьиз булутар.

Бубади кIул экъисна
Илигзава къелемар,
КIвалин вилик квай сала,
КIватI хъувунвай келемар.

Хабаркьазвакъуншиди,
Кьил хкажна жугъунлай,
ГалкIаца хьиз мез галкIиз,
Кап аладриз руфунлай:

- Эй кьуьзек, на угь ийиз
Къелемрикай вучзава,
Чандик кумай са кIус кьван
Къуват сала пучзава?

Аквадайвал, рикIел ви
Алач кьиникь мукьвара,
Гьатна са къуз хабарсуз
Азраилдин ракьара.

- Кьиникь рикIел ала зи,
Хиве авай буржи хьиз,
Са къуз кIандай вахгана
Жувал алай харжи хьиз.

Бес гьакайла тушни за
Ибур сала цазвайди.
Намус кумач вак, къунши,
Зегьер хьуй ваз хъвазвайди.

Зун фейила рагьметдиз
И чил, цав, рагъ амукьда,
За икI угьтал ацалтна
Кутазвай багъ амукьда.

Амукьда муьгъ за авур,
Дагъдин кьакьан дагьардал,
Булах, агъзур касди кIуф
Эцигзавай чIутхвардал.

Вуч амукьда кьейила
Вун, эрекьдиз дуст хьанвай,
ЯхцIур йисни тахьанмаз
Лахлах хьиз икI суст хьанвай?