Аквада

АКВАДА


                Жузамир хьи, вун гьинава, аквазвач?
                Зун ватандин ц1ай галайдаз аквада.
                Лумат1буруз къэкъвейт1ани аквадач,
                Рик1е къени ашкъ авайдаз аквада.

                Хайи чилин ч1ур акъатай рекьерик,
                Ц1уру хуьре зуьрне галай мехъерик,
                Дагъда къуьнел кавал алаз, мекьерик,
                Ц1игелвилин агь атайдаз аквада.
               
                Аллагьди чаз багъишнава лезги ч1ал,
                Гьар лезгидин ярашугъ я дуьзневал,
                Михьивилив ухшар я ам гуьзгуьдал
                Лайлай лугьуз ахвар хайдаз аквада.

                Ашукь я зун т1ебиатдал дигедин,
                Аламатдал ц1арц1ар гузвай чигедин,
                Булахд рекье наз экъуьнрал бикедин
                Ч1аларикай гам храйдаз аквада.
 
                Ц1радайла цава гъетер яралай,
                Авахьдайла чигедин зар таралай,
                Экъеч1дайла яр эйвандал гар алай,
                Зун гьижрандин ц1у канвайдаз аквада.
         
               
                Абур гъида гьар са касдал зегьметди,
                Кесиб уьмуьр багъишайт1ан кьисметди,
 .                Агакьдач зат1 гьалал фудин кьиметдив,
                Зун дуствилив фу ат1айдаз аквада.