Шаирдин жаваб

(зарафат)
(са низ ятlан,кьунвай тlварарихъ шиирар аваз хьун-дуьшуьшдин квалах я.гьавиляй инжиклу хьун герек авач)

Хьана-хьанач са шаир,
Элда тlвар-ван авайд тир.
Хъсан чlалар кхьидай,
Гевилар хуш ийидай.
Гьар,акъатур къелемдай
Гаф,сейли тир алемда.
Асасни хьи,кхьидай
Бул теснифар,ашкъидкай.
Гьар шиир са гуьзелдиз
Талукьнавай къезел тир.
Ада шиир кхьейбур
Сад садлай тир ийербур.
Тарифнавай Туькезбан,
Лугьуз-вуч я ийер кьван...
Им Фатима,им Пайкар...
Сад садлай ийер,пайгар.
Амма паб а шаирдин,
Тир фугъара,са ади.
Кхьиз майил авачир,
Кlелунрик хев квачир...
Кlвал тир авай кесби-кар,
Садни вичин аялар.
Къайгъу чlугваз хъсандик,
Квай вичин хизандик.
Садра жеда ихьтин кар-
Хуьре аваз мехъерар
Таниш папаркай сада,
Адаз и кар лугьуда:
(Фитне вачир межлисар
Папаризни жеда жал?)
"Има вуч я,я Гуьлбес,
Ви итимдин и гьевес?
Туна къвалав паб жуван
Тарифзава чарадан."
...Хкъведа лап пашмандиз,
Ацьукьда ам айвандик.
Шаирдизни акуна,
"Вуч хьана,"-луз жузуна.
Ахъайна дерт-гьал вичин,
Рикlе авай къал вичин
Гъуьлуьз ида агьвалат-
Жеда паб дуьз гьавалат.
Кефни чlуртиз шаирда,
И кар икl веревирдда-
Лугьуда вичин папаз:
"За шиирар вири ваз
Кхьенвайд я,я ахмакь,
Яб акалмир гьар садахъ.
Тlвар вид кхьенвач хьи,за,
Лугьуз тахьуй халкьди заз...
Папаз чlалар кхьизва,
Къавумвалар ийизва.
Теснифариз папаз чlал,
Изва хала-хатурвал".