Куьч хьана

Дагълар есир хьана къайи гарарин,
Иесияр яз къадим тир сурарин,
Хуьрер амач, кIвалер амач, куьч хьана,
Чи лезгийри чIугур женгер гьич хьана.

Гатфар чIавуз тамаш цуьквер гамариз,
Гьар са емиш, ничхир авай тамариз,
Хуьрер амач, эллер амач, куьч хьана,
Чи лезгийрин сергьят, сенгер гьич хьана!

Булахрин рикI къана живед муркIарик,
Халкь аранда, пай кумачиз ЯркIарик.
Жегьиларни хизан галаз куьч хьана,
Чи лезгийрин дегь адетар гьич хьана!

Дагълар акваз, ракъин кIаник цIаразвай,
Багълар акваз, пеш алачиз кьуразвай.
Мал, хеб амач, техквер патахъ куьч хьана,
Чи лезгийри чанар гунар гьич хьана!

Яраб мад чан хкведач жал дагъларал,
Вилер ала, акьалтзавай чагъларал.
Чи лезгийрин девлет гьуьлуьз куьч хьана,
Чилер пайна, цаварни кваз гьич хьана!

Низ лугьуда, никай куьмек тIалабда?
Йис-сандавай гьатзава халкь азабда.
Ярар-дустар, хванахаяр куьч хьана,
Мугьманриз фин, мугьман атун гьич хьана!

Сажидин, вун руьгьдай михьиз аватна,
Гъариб жемир, буш ийимир къуват на.
Мад дагълариз хуькведа халкь, куьч хьана,
ЧIугур кьадар хажалатар гьич хьана!