Мад са гуьруьш

Рикlелни алачиз, шумуд йисалай,
Бахтуни и гуьруьш къе заз дуьшуьшна.
Са мярекат яз, зун дустин кlвалева,
Вунни ацlукьнава, ингье, зи туьшда.

Ахкун тийиз авай са-сад мусалай,
Гила раст хтана чун садлагьана.
Килигзава на заз, ийиз усалвал -
Саки хиве кьазва жуван гуьнагь на.

Пlуз ви юзазвачтlан, вилер рахазва,
Жузазва сакини завай зи гьалар.
Ишел галайни хьиз, чене агъвазва -
Рикlел хкизва на белке фейи къар.

Зунни амазва гьакl пагь атlай хьтин,
Дустар - танишарни ахквазмач патав.
И гьалди, кьисметдиз аватай, кьетlен,
Ацlукьур чкадал унва зун татаб.

Фенатlан жегьилвал-а уьмуьрдин пай,
Акьван дегиш хьанваз аквазвач заз вун.
Са пеле гьатнава гел - иер,чlагай,
Ама виликан, заз таниш, килигун.

Завай эхиз тежез и килигунриз,
Дадзава - са легьзе вил агъузнайтlа...
Гуж амач заз абур мад иливунриз -
Рикlел гъиз мад жуван - гьикl ялгъуз ятlа...

Вунни тек атанва мярекадиз къе...
Вунни ялгъуз ятlа яраб зун хьтин?
Белке кухкlуда луз уьмуьрдин рекъер...
Са гъвечlи умуд я заз мад амайди.