Дидейрин дерт

Гуьллед вилик физва дидед хурудай
Хъвайи некер сивелламай аялар.
Душмандизни баладин дерт такурай-
Давам жеда и кар гьикьван чlаварал?

Кьил акъатдач ислягьвал я,дяве я-
Гьим душман я,гьим дуст ятlа чидач ваз.
Кьурбан физва жегьил чанар гъавая,
Мус жеда им куьтягь хьана са патаз?

Аялар цlуз ракъурзавай бендеяр
Туш кесибрин дердиниз гьич беледни.
Мехъерариз гьазур хьанвай дидеяр,
Чlарар чухваз ама кьилик,веледдин.

Ракъурзавай и жегьилар дяведиз,
Руфун яцlу,жибин яцlу "агьилар",
Хел атlуз я куьн цlирзавай вядедиз,
Бес кьадачни куьн дидейрин агьина?!

Чlехи дердер чlехидаз жез,гъвечlидаз-
Гъвечlи гъамар жеда лугьуз умуднай.
Куьз фелекдиз, и азабар гайидаз-
Са гъвечlи халкь икl чlехидай акунай?

Ата-буба чилерал са чарада,
Недай фан кlус элкъуьрнава агъудиз.
Зи халкь ама вацlунни цlун арада,
Затlни тежез кьуд пад кьунвай ягъидиз...

Вилик физва дуьз хатакар гуьлледин,
Пlузардал нек кьуранвачир аялар.
Диде аку мехъер такур веледдин-
Я сад аллагь,гьикl эхзава цава на?