С. Есениназ

Бахтунай наздалди,эркиндиз хуьнар
Хьаначтlан кьисметар ваз,чан аламаз.
Жувалай ахпа на са уьмуьр туна-
Гзафбур авайд я вал пехилвалаз.

Шиирар кхьенач на тапшуругъдал,
Шаирдин,юзазач гьиссер,тапаррив.
Кхьиз ацукьайла вун са шиирдал,
Чlулаварна чар на,рикlин гафарив.

Поэзия вуч ятlа кьатlун тийидай,
Руьгь мичlи касарни вал пара гьалтна.
Хьана легьзеярни,пашманвал гъидай-
Кlанз-дакlанз илгьамдин вар на агалдна.

Чlехи регьберризни вакай кичlе яз,
Суьргуьнна,къакъудна хайи чуьллеркай,
"Ичери шегьер"дин дар куьчейраваз,
Шиирар лагьана вуна гьуьлеркай.

Иран я лугьузни ттабарарна ваз,
(Икl регьят шаирни алцур жеда жал!)
Теснифаз хьана вун Хорасан,Шираз-
Кьуна а наданар ахмакьд чкадал.

Язух!Пара язух абрун гьалуниз,
Шаирдин руьгь ади руьгь туш-чир хьанач.
Часпарар авайд туш гафуз-чlалуниз,
Сад я-кьибле хьана,я кефер хьана.

Чlулав шаршав галаз зененар,ингье,
Инихъ физ,анихъ физ пингвинар хьиз...
Чир хъжез гьар сада ваз са Шагьане-
Галатнач вун,абруз-шиирар кхьиз.

Шаршавдай аквазвай кьве вил тиртlани,
Акуна кlаниквай ийервални ваз.
А расу чlарар ви,ама-гилани
Кьибледин рушарин мецел,мани яз.

А ийер таватри,вун гьич рикlелай
Алуддач-разивал абрун кьабула.
Рязандин ник хьиз михьи никелай,
Кьачунва абруни вичин дувулар.