Чи дагълар

Шаир Эйваз , теснифайла дуст сувар,
Сад-кьвед гафни чи дагъларкай лагь , Куьне!
Завай жедач - Куьн я гафун устарар -
Тарифун кlунтl дагъ жеда , валлагь , Куьне.

Стхадикай катнавайд тир Кьасум хан,
Чи дагъларин синед далу тунаман!
Сенгер лугьуз , гилани тlвар амакьван -
Са къеле я лугьуз , машаллагь , Куьне.

КЪАВГЪАДАРАР - куквар къацу тала хьиз,
ШИРВАНДЕРЕ - кьакьан чlарчlар авахьиз.
Мумкин хьайтlа АТЯЙЛАХДИЗ акъахиз -
Гъил вегьена кьада цавун тагъ , Куьне.

КЪОПАЛДАГЪдин лекь элкъвезва пакварал,
Чlалахъ жедач жуван вилиз акварал.
Дагъдин яцар акъвазнава кукварал -
Гватlан тфенг , тура абур сагъ , Куьне.

БАЛТАКЪАЯ , КЪАРАБУРГЪУ , ГЕМКИЯР ,
Ген къацу тlул - гьала жеда гимияр.
Хъфидай хьи , гъилевайтlа ихтияр -
Кеф чlугазва дагъ кьвалаллаз , пагь , Куьне.

Берекетлу я лап кьецlил рагарни ,
Кlватlа жуваз камбар кутаз СУРАРни.
Хупl жедай хьи , ЦИРИйрикай афарна-
Ацукьан нез , уна бисмиллагь , Куьне.

Гатун цlиг я , гьелени аяз кума,
Пешер кlаник живед маргъал яз , кума.
Амандин кlвал - ялгъуз тахьуй а кума-
Ша куькlуьра ана са чирагъ,Куьне.

За вуч лугьун,гьатна рекъе са гатуз,
Акъата Куьн чи патариз дагъ атlуз.
Чи дагъларни шад жеда Квел , за кьатlуз -
Пашманвалдач атунал , иллагь Куьне!