Марф

Къе ухъненлай марф кьвазава
Атlун тийиз.
Гьар са стlал саф кьвазава-
Вилин нагъв хьиз.
Цифеди хьиз,кьунва бушлух-
Цавун,чилин арадавай.
Тебиатди саки са рук,
Стlалрикай,хранава.
Ахквазамач цавуни къав-
Саки ам са-
Дегьне-чlулав.
Гимишдикай лацу гъалар куьрс хьанава
Цавай-чилел.
Кlан хайитlа элкъуьра лап жуван гъилел...
Ваъ,кlан ятlа къаз-къаз акъах винихъ-цавуз...
Авани кас-
Гьич тlавур къасд
Садра хьайтlан,гьинтlан чlавуз
Гъил ахъайна фин кьакьанриз-
Лув гуз,лув гуз!?
...Марф кьвазава,
Чин винизни акъвазна зун
Килигзава,кьакьан цавуз...
Авахьизни чинай агъуз
Ятари,зи,чуьхуьзва,чин.
Акъатзава чанди авай юргъунвилер-
Гьар са ифин.
...Пара чlав тир марф авачиз,
Кьуранавай,канвай чилер.
Марф атана гила мадни
Ийиз вичин михьивилер,
Гваз вичин серинвилер...
...Зун рази я-хьурай,хьурай,
Чилеризни марфар кьурай,
Рикlеризни марфар кьурай.
Кьурай фад-фад...
Чlуру фикир,хияларни-рикlеравай
Акъудрай мад.
...Агата,марф,агата захъ-
Чин хьиз и зи руьгьни чуьхуьх,
Хьурай ам пак!