Тавуртlа

Инсанар къвердавай ава дегиш жез,
Лагьайтlа гьикl жеда,лугьун тавуртlа?
Умуд я амайди-белке дуьз хъжен,
Хъагьайтlа гьикl жеда,хъугьун тавуртlа?

Гъиле кьуркьан ава,мецел таб алаз,
Герек ян-шайтандиз ябни акалаз,
Вири алакъаяр ихьтиндахъ галаз
Атайтlа гьикl жеда,атун тавуртlа?

Дуст кьуна,рикlин сир гузватlа эгер,
Ийизва намертвал гьич мумкин тежер,
Адан вичиз и кар-дуьз хадай рикlер,
Хъавуртlа гьикl жеда,хъавун тавуртlа?

Чарадкай гаф лугьуз,фитне авурла,
Масадан вилевай са чlар акурла,
Амма жуван виле кlарас такурла,
Къалгьуртlа гьикl жеда,къалгьун тавуртlа?

Чlехи-гъвечи амач,амач гьуьрмет-гьакь,
Жегьилар акатда крарик нагьакь,
Бубайрин вилериз авудда бармакl,
Сабурун гьикl жеда,авун тавуртlа?

Агьилри ийизвай ихтилат,сугьбет,
Атана,кутада абурик гъелет,
Абыр хуьн паталди тагайла зегьмет,
Акуртlа гьикl жеда,акун тавуртlа?

Сада мярекада чеб кьуна виниз,
Масадан гафариз ягьанатариз,
Рахайла,залан гъуд вегьена сивиз,
Гатайтlа гьикl жеда,гатун тавуртlа?

Намик,вавай ибур дуьз хъейи жедач,
Шиирар кхьинал кар виже къведач...
Лап лугьун гафари затlни ийидач-
Авуртlа гьикl жеда,авун тавуртlа?