Адакай булдиз рахаза заз бубади...
Дагъларин чинал нахиш я Къуруш хуьр.
Тарифариз чебин хайи убадин,
Мецел алай са алхиш я Къуруш хуьр.
Гатфар тежез яру цуькер акъатда,
Живер цlана маса эквер акъатда,
Пад-къерехдив элкъвез лекьер акъатда,
Тебиятдин са бахшиш я Къуруш хуьр.
Зун рехъ гьатна а патариз кьанач гьич,
Зи лепирар Ярудагъда хьанач гьич,
Сас тlакьана къайи ятар хванач гьич,
Са шикилрай заз таниш я Къуруш хуьр.
Ацlукьнава чеб синеррал дагъларин,
Яйлахар я,чка тушкьван багъларин...
Лагьайтlа жез-кlуфар хуьцуь рагарин
Цавух галаз тир гуьруьш я Къуруш хуьр.
Вил гала хьи са сеферда финихъдик,
Ацlукьнани Нисиндагъдин кlанихъдик,
Вил вегьена Кичlенсуван винихъдик...
За чиз,мугьманрал вердиш я Къуруш хуьр.
Къуруш хуьр
© Copyright: Намик Фарзалиев, 2016
Свидетельство о публикации №116041403043
Свидетельство о публикации №116041403043
Рецензии