Дустариз

Дуьнья вири мискьи гъупа,
Кьаз жедай туш азиз дустар.
Тек кепекрин ван хьун япа,
Азар я гьар рик1из дустар.

Я халкьар, куьн хьунал пехъи,
Къурамат чи кьадач векьи,
Йифиз къачагъ, юкъуз фекьи,
Гуж я кьиляй-кьилиз дустар.

Гьар сад хан я, бегьем халу,
Гьардаз к1ан я тике ягълу,
Амма садни жеч вафалу,
Килигиз тек гъилиз дустар.

Намусдикай тахьанмаз руьхъ,
Ахмакьвилин алудур муьхъ!
Ваз хъхьида, т1имил элуьхъ!
Хкаждач гьахъ виниз дустар.

Ажуздакай ат1уз тике,
Чакъалрин хук жезва еке,
Иблис чпиз язва Мекке,
Къуръан кьулухъ вегьиз дустар.

Мугьман къведа, акатда хъел,
Хуьрекдиз гъупал вегьиз кьел.
Я саймишдач, тада гъенел,
К1вализ илиф тийиз дустар.

Бязибуру хкажиз цал,
Чир тахьуй луз къуншидин гьал.
Белки куьмек к1ан жеда жал,
Сес татуй зи к1вализ, дустар.

Намуслу кас тийиз къени,
Вуна дуьнья къизил суьни,
Виш хуьрекдин чук1уриз ни
Тухузва низ? Кц1из, дустар.

Сулейманан акъваздач мез,
Гьар пис-хъсан акурай квез.
Лугьузва за рик1ел нагъ къвез,
Адалат яхъ к1евиз дустар!