Гатфар кьиле экьечlза вун тlамара,
Эхирдални гьич шад жедач,беневша.
Какурнава жегьил гардан къамари,
Вуч ятlа ви дерди чидач,беневша.
Ахъайа рикl,регъуь жемир са кlусни,
Ам вуч дерт я,лугьу тежер цавузни?
Ягьанатдач за гьич ви са гафузни,
Вучиз вуна зав сир гудач,беневша?
Залан дерт я ялгъузвал,заз чида ам,
Патав тахьун кlаниди,я тежер гъам.
Гьикl ийин хьи,хуьтягь хьана и стlам-
Вуна гардан кlир хъейидач,беневша.
Зи дуствални хупl кlевид я,чир хьухь ваз,
Хаянатвал хесет кьур туш за жуваз.
Зунни ама ярдин рекъе дерт чlугваз,
Чан кlевид я кьван,рекьидач,беневша.
Белке дегиш жеда и чи замана,
Гвадарза инсанринни яманвал.
И Намикни "чеб-чебиндак" агакьна,
Дуьньядал мад тек хъжедач,беневша.
Беневша
© Copyright: Намик Фарзалиев, 2016
Свидетельство о публикации №116041310101
Свидетельство о публикации №116041310101
Рецензии