Бахтаварвал

Заз чир хьанач дидед чlалал кхьиз,кlелиз,
Кlелун,кхьин дидедизни зи чир хьанач.
Амма ирид йис жедалди и зи кьили-
Чара чlалар авайдикай хабар къунач...

Дидед чlалал чун рахана кlвале,кьецел,
Вуч лагьай гаф тир чlал чидач лугьунарни...
Гьа виляйни гилани зи ала мецел-
Дидед чирай амаларни,къугъунарни.

Хайи чlалал лайла яна заз дидеди,
Хайи чlалал чан лагьана,алхушарна.
"Диде хьурай,-лагьана заз,-ви метериз",
Хъел атайла хайи чlалал "къаргъушарна".

А дидейрин авладар тушни чун гила,
Вучиз чидач чи балайриз хайи чlал,бес?
Чи "багьнаяр"акьадач хьи,гьич зи кьиле,
Вуш хьана бес чаз дидейри гайи чlал,бес?

Дидейрикай гила хьанва "ана","мама",
Рахурзамач балаярни хайи чlалал.
Лезги лугьуз са кьуранвай тlвар я ама,
Аялризни чидач "диде" гаф вуч я жал...

Чаз чизва чlал,гуз туш амма чин-абуриз,
За аялар къинемичдач-чид я гунагь.
Бес абури вуч хгуда чпинбуриз-
Гьикl жеда гьал,хайи чlалан чи,куьне лагь?

Къарибвилиз акъуд мейир зи и гафар,
Чlал квахьда-аялриз ам чир тахьайтlа.
Дидед чlалал рахурай къуй куь балаяр,
Дидед чlалал рахазвай халкь бахтавар я...