Лезгияр я, лезгияр

И шиир за машгьур компазитор
Мегьамед Гьуьсейноваз бахшзава!

Малкъарадал цаз, къарагъриз кьуьгъверар,
ТIанурдин фахъ незвай таза дуьдгъверар,
Гад кIватIайла, ийиз мелер, мехъерар,
КIвалахардай Лезгияр я, Лезгияр!
Гьар сада вич кьазвай дагъдин лекьерай,
Дамахардай Лезгияр я, Лезгияр!

Чилер вара-зара ятIан никIерин,
Тамар закIатI ятIан жигер рикIерин,
Баркаллу яз инсанвилин рекьерин,
КIвалахардай Лезгияр я, Лезгияр!
БалкIанраллай чамарар яз мехъерин,
Дамахардай Лезгияр я, Лезгияр!

Дегиш ятIан гьукуматар, къайдаяр,
Ажузвалдай тушир рушар, гадаяр,
Гагь яракь кьаз, гагь мукални кIутаяр,
КIвалахардай Лезгияр я, Лезгияр!
Кьилер кIеви, къастар хци жидаяр,
Дамахардай Лезгияр я, Лезгияр!

Са гила туш, шагьидар я тарихар,
Намус багьа, туьнтбурни тир къилихар,
Гьилле течир, кардик квачир синихар,
КIвалахардай Лезгияр я, Лезгияр!
Чин тийидай женгера чан хуьнуьхар,
Дамахардай Лезгияр я, Лезгияр!

Сажидиназ хас туш кьуру тарифар,
Адан тереф хуьз гьазур я арифар.
Вили-вилик физ, кам тийир зайифар,
КIвалахардай Лезгияр я, Лезгияр!
Ватан патал чан гуз текъвер гьайифар,
Дамахардай Лезгияр я, Лезгияр!