Дустарин жуьреяр

Дустар ава ви вилик дуьз къалуриз,
 Ви далудихъ ада ваз фур ат1уда.
 Вун маса гуз фида ви дуст арзадиз,
 Амма вуна а кар геждиз кьат1уда.
 
 Дустар ава ширин мецел рахадай,
 Игри хьана ви вилик ам къекъведа.
 Къарагъна вун хъфидайла кимелай,
 Ви гуьгъуьнай ягьанатриз хъуьреда.
 
 Дустар ава пулуни вил авайбур,
 Пул акурла абрун вилер дак1вада.
 Кесиб хьана эгер фейт1а ви абур,
 Катда вири вун ак1айт1а кьарада.
 
 Дустар ава, ви вилик ви тарифиз,
 Вилералди ви к1анидав къугъвада.
 Алахъда ам ви к1аниди къакъудиз,
 Ахтармишна вун гъафил хьай арада.

 Ихтин ч1уру рик1ин дустар жедалди,
 Душман хьайит1а хъсаня ви далудихъ.
 Дустуни вун яда таквар чук1улди,
 Душман вуна вилив хуьда парудихъ.

 Дустар ава, дустунихъди рик1 кудай,
 Са ч1авузни а касди вун гадардач.
 Куьмек ийиз алахъда вичивай жедай,
 Вичин намус,гъейрат,абур квадардач.
 
 Рик1елай фидач вичиз авур хъсанвал,
 Ви гьуьрметдиз гьуьрмет ийиз алахъда.
 Твадач хизанрин арада чаравал,
 Арха хьана ви хизандик акахьда.

 Мехъер юкъуз гурлу ида ви межлис,
 Пашман юкъуз ви дерт пайиз алахъда.
 Ви сир гудач, вакай ам рахадач пис
 Ихьтин дустар стхайрив гекъигиз жеда.