Мусар булах
Мусар булах, ви тарихар дерин я,
Ви тарихрай кьил акъудун четин я,
Яд гьамга я, набат хьиз вун ширин я
Ви яд хъвайди гьамиша я чагъ булах.
Мет яна за хъвазва яд ви сивелай,
Нек хъвадай хьиз, балад дидед хурулай,
Макан я вун берекатдин нур алай,
Вун зи хуьруьн берекатдин багъ, булах.
Яб гана на шумуд рушан сирериз,
Шумуд къарид агь тухвана гьуьлериз,
Шумуд кьисмет хьанат1а лагь гъуьлериз,
Вун шерик яз муьгьуьббатдин рагъ, булах.
Атай мигьман ви яд хъунихъ къаних я,
Чи ашукьрин ч1алариз вун лайих я,
Гельхенвийрив гвайди гьа ви къилих я,
Гьа ви яд хьиз михьи я чи тагъ, булах.
Чи хуьряй тир ашукь Амрагь,Гьуьсейин,
Абруз ви ци пай ганай ашукьвилин,
Гьа ви яд хьиз рахадай чеб хуп1 ширин,
Вун зи хуьруьн межлисдин чирагъ, булах.
Кадимбег Ильясов
© Copyright: Кадимбег Ильясов, 2016
Свидетельство о публикации №116033107989
Свидетельство о публикации №116033107989
Рецензии