Намус ганва гьар са касдиз Аллагьди,
Дуьньяд винел дуьзвал хьуруй лагьана.
Намус квай кас кьадач лугьуз гунагьди,
Чаз Аллагьди дуьзвилин рехъ къалгьана.
Вучиз намус аватзава кьиметдай ?
Вучиз адан къадри амач инсанриз ?
Атанвайд я чи несилрин девлетдай,
Маса гузва регъуь жезвач вижданриз.
Маса гузва сада вичиз къуллугъдихъ,
Кьимет течиз вичи багъри намусдин.
Садбуру ам маса гузва пулунихъ,
Квадарзава михьиз абур инсандин.
Намус квачир инсан халкьдиз хата я,
Ада халкьни маса гуда душмандиз.
Адан алчах амаларни пара я,
Ахьтин инсан кьелен пар я хизандиз.
Ахьтин инсан гьич хуьрени герек туш,
Ада халкьни душманарда сад-садаз.
А алчахди-дуьньядикни хкуьрда кьуш,
Адакай хийир хкатдайтуш масадаз.
Кадимбег Ильясов
Намус
© Copyright: Кадимбег Ильясов, 2016
Свидетельство о публикации №116033107965
Свидетельство о публикации №116033107965
Рецензии