Уьмуьр

Ажеб дерин я уьмуьр ви амалар,
 Ви сирерай  кьил акъудун четин я.
 Гьикьван вакай ийизва за хиялар,
 Ваз къайгъу туш,ви рик1 пара секин я.

 Кьведни са къуз атана чун дуьньядал,
 Кьведхеяр хиз са дидеди ханавай.
 Са меслягьат хьанач кьведан арадал,
 Яб гузвач на гафуниз за лугьудай.
 
 Зи уьмуьр я,вун заз пара ширин я,
 Багъри я вун,гьич и кардиз шак авач.
 Вахъ галаз заз вучиз ят1ан четин я,
 Маса уьмуьрдиз фидай заз рак авач.
 
 Белки заз хьиз вазни зун тирт1а ширин,
 Вакай зазни регьатвилер аквадай.
 Чи алатай вахтар фидачир четин,
 Рик1 ачухна зун вахъ галаз рахадай.

 Гила кьванни килиг вун зи дердидиз,
 Яваш хьухь вун, акьван тади къачумир.
 Мурадар ама къвезвай зи фикирдиз,
 Мажал  це заз,залай вилик экеч1мир.

 Кьведни са къуз атана чун дуьньядал,
 Кьведни са къуз и дуьньядилай хъфида.
 Гьуьрмет алаз хьуйрай кьведан арадал,
 Гьуьрметдивди а дуьньядиз элифда.

   Къадимбег Ильясов