Ватан рикIеваз...

КIани я заз и чуьл, и дагъ, и дере,
И чилел акъатна зи аял йисар,
Хиялриз фенай зун и вацIун кьере,
Мурадрик и чили кутунай лувар.

Нубатда хьана зун суван ценера,
Марфадиз, цифериз килиг тавуна.
Хипер, малар хвена дерин хинера,
Саврухрин къаяри, аязди кьуна.

Гьикьван векь ягъана кьакьан сувара,
За къилав гудайла гъил-тIуб  атIана…
КьуньчIуьк ктаб жедай  верцIи чIавара,               
Зегьмет ина гьисна, уьмуьр кьатIана.

Чими къулан патав кIелиз ацукьна,
Лемпедал акъудна за хъуьтIуьн йифер…
Ина рикIе гьатна, рикIе амукьна,
Вилера ашкъ авай са рушан кифер.

КIани я инсанрин хуш тир ниятар,
Легьзе, лекь къарагъдай дагъдин синелай.
Кимел ихтилатиз фейи сятар,
Алудиз жедани вавай рикIелай?

КIани я  таватар, гуьлуьт храдай,
Рагъ гуз-гуз ацукьна  хьрабдин* кIане,
Аял ,дидедин рехъ, т1унут1 чрадай,
Гуьзетиз акъваздай хьар галай гъене…


Мукьвал я, лап мукьвал и пад цавариз,
Гъетерин рапрапин –суьгьурдин алем!
Хайи чил къвезва зи фад –фад  ахвариз,
И ватан  рикIеваз ягъизва  къелем!

-------------
*хьраб - куп1арин харал.