ЧIал хуьн чна хазина хьиз, нямет хьиз,
Чав асиррин гелер галаз агакьай.
ЧIал хуьн чна хайи таратI, девлет хьиз,-
Гьар девирдин азгъунвиляй акъатай.
ЧIала ава меденият зи халкьдин,
Тух жедани яд хъунал и булахдай?
ЧIала ава акьул, ният зи халкьдин,
Игитвилел гьар са касди дамахдай!
Дидедин чIал - «Лезгинка» я, мани я,
Ван хьайила, тахда иви къугъвадай,
Дидедин чIал,Кьулан вацI хьиз, кани я,
Гьам перишан, гьамни шад яз аквадай.
ЧIалахъ гала гьихьтин къудрат дагъларин,
КукIушривди душмандин рикI акъуддай,
ЧIал - цуьквер я, атир галай багъларин,
Вичел чIугдай, багъридив хьиз агуддай.
Лезгидин чIал низ герек я - лугьумир,
ЧIал - Диде я, чIал - хайи чил, чIал - Ватан!
Хайи чIалаз виняй агъуз килигмир,
Ягьанатмир дидедикай на жуван!
ЧIал хуьн чна!
© Copyright: Билал Адилов, 2016
Свидетельство о публикации №116022112527
Свидетельство о публикации №116022112527
Рецензии