Ялда дагълари

(Шалбуз дагъдиз сифте атайла,чин цавална, тан къванерин цIарцIе  твада и кардиз “сур атIун” лугьуда.Кар я  кьилел къаза атайтIа…
РикI ацIайла вегьеда за
Са вил дагъларал.
Яргъи тада кьибле лугьуз
За гъил дагъларал.

Кьведан кьилни цIайлапанри
Гатазва лугьуз,
КукIушрал жив, кIакIара кьеж
Аквазва лугьуз.

Сад хьиз акваз кьисметар чи,
Ялда дагълари.
Йиса садра татайтIа зун
Къалда дагълари…

…Кап алтадна шумуд къванцел
Темен тавална.
“Сур атIана” Шалбуз дагъда
Заз чин цавална.

-Зун рекьиз ваъ, зияратдиз
Атанва стха,
РикIе дагъдиз лугьур гафар
АцIанва стха.

Алахъзава гъавурда тваз,
Межевирди зун.
Яб гана за и касдизни
Хъвунач рахун.

…Сел себеб яз, са тIимил кьван
Ян ганвай жигъир,
Тек кукIушар зи ашкъи хьиз
Эвелан хьиз тир.

И кукIушар винизнавай
Гъилер хьиз хьана.
Булахарни алахьзавай
Вилер хьиз хьана.

Къеъквена зун и кьакьанра
Жувахъ къекъвена.
Чирагъ кьуна дидедин чIал
Шиир кхьена.

Ашкъидин гуж и гирвейрин
Къилихрай кьуна.
Нехишрин таж, хайи чилин
ЦIилихрай кьуна.

Винизна гъил кьваларив сад
Аладарна рикI.
Дагъдин селдив гана тIалар
Авадарна рикI.

Мукьвал хьана, зун жув-жуваз
Селерин кьиле.
Пелеш я зун, жагъанач мад
Къекъвезма гьеле.