Къайил я зун и камарал
И чил я зи кьин.
Яргъи тийин и ихтилат,
Ша Чархидал фин.
КукIуш лацу Шагьдин кьвалар
Гьайкалар чилин.
АкI жеда ваз, дагъни гьуьлни
Юкьвалла гъилин.
Лезет къачуз дуьньядикай
Къведай вахт ава.
Цуькверикай хъуьцуьганни,
Векьин тахт ава.
Лечекрилай стIал кIватIна
АцIурна такъа.
Хайи чили вичин гъилив
Ахъайна суфра.
Ашкъидикай ялав кьуна
Алугзавай чуьл.
Фагьум гана, илисна вил
Алахьна гуьгьуьл.
Ч1иж элкъвезвай цуькведилай
Са наздив къугъваз.
Пехил-пехил килигна гар
Акъудна яргъаз.
Хъухъвана цуьк, юзурна гъил
КIанидаз вичин.
Зун акуна регъуьвална
Чуьнуьхарна чин.
И накьвадин цуькведизни
Намус, ар ава.
Зи шиирра, гьавиляй я
Чархид тIвар ава.
*Чархидин пел- Чипиррин уьруьшда кьакъан пел.
Ша Чархидал фин
© Copyright: Эйваз Гуьлалийрин, 2016
Свидетельство о публикации №116021709441
Свидетельство о публикации №116021709441
Рецензии