Гуьзел
Йифиз-юкъуз вахъ ц1игел тир вилеркай
Чуьнуьхарда вучиз вуна чин, гуьзел.
К1анда рик1из, худа, вун зи пата хьун
Ч1алал къвервал зи рик1 алай и гуьзел.
Рик1ин чара:- акунар ви, дамах ви,
Вилив санал къаз тижедай бухах ви.
Жез авачт1а муьгьуьбатдин ч1алахъ зи
Гьазур я къаз зун паквилин кьин гуьзел.
Эвел-эхир, чун сад-садаз п1ир жеда,
Ашкъидин т1ал, такурбуруз сир жеда.
Яр авай руш вилерилай чир жеда,
Чи бахтуниз ц1ийи уьмуьр гъин, гуьзел.
Яргъаз ая и адетдин наз вуна,
Азаб гумир, леззет бахша заз вуна,
Эйваз лугьур диванедин гъил къуна
Гъам авачир са дуьньядиз фин, гуьзел.
© Copyright: Эйваз Гуьлалийрин, 2016
Свидетельство о публикации №116021705988
Свидетельство о публикации №116021705988
Рецензии