Агат хъия, хайи чилив
Видни я ватан.
Хкаж хъия на парудал
Аватай са къван.
Са югъ ава къариб чилел
Амукьдай сефил.
Рехи яз кьил, зайиф яз вил
Дарих яз гуьгьуьл.
Хъиткьинзава ватандин хур
Веледрик вичин.
Ц1игел хьанва бубадин гъен
Гелерихъ хцин.
Шумуд йис я, хквен тийиз
Ви рик1 къван яни?
Я тахьайт1а, руьгь амачир
Къуру тан яни?
Куьн дидейри къариблухриз
Хайиди тушир.
Чиликай к1вач ат1уй лугьуз
Хвейиди тушир.
Бес гъам ч1угваз халкь хьанани
Диде бинедлай?
Шумуд диде вил рекъеваз
Фена дуьньядлай.
Агат хъия, хайи чилив
Видни я ватан.
Хкаж хъия на парудал
Аватай са къван.
АГАТ ХЪИЯ
© Copyright: Эйваз Гуьлалийрин, 2016
Свидетельство о публикации №116021609594
Свидетельство о публикации №116021609594
Рецензии