ТЕКИдал руьгь рахада зав

   

Аста к1ела шиирдин ц1ар,
Яб це са герен.
Чидани квез, шаир Эйваз
Хтул я п1ирен.


Эренлердин кьибле пата
Дагъларин юкьва.
Теки лугьур женнет ава
Аллагьдиз мукьва.

П1ир Гьасана бине кутур
Макан я и чил.
Агъузда кьил и накьвадихъ
Иман я и чил.

Дуру жеда инсан ина
Земземдин жуьре.
Зи баде хай муг инава
Текип1ир хуьре.

Лув гуз ава «УАЗ» ди чи
Дагъларин чиниз.
Мукьвал жеда зун жув-жуваз
Атайла иниз.

Шихнесиран шиир к1елиз
Зи т1ул кьат1ана,
Хуш рахада Борис халу:
- «Хтул атана!»

Эхтилатда Зуьгье халад
Алуд тийиз вил.
Къелем суса суфра гъида
Къакъажна кьве гъил

Вилин къене чка гуда
Илифайла зун.
Залай к1венк1ве дагъ ац1уда
Кьекъифайт1а зун.



Хкъаж жеда Чалад тарцин
Гуьнедин къуьнел.
Туп1ув хада чешмедин мур
Шуршурдин пелел.

Пили къванцел шагьварди зи
Эвягъдамаз ч1ар,
Акахьна фад дагьдин селдик
Авахьда зи ц1ар.

Къэкъведа зун рик1 ац1ур кьван
Дагъдин яхада.
Байихари яб акализ,
Зи руьгь рахада.

Заз и чилел атун хуш я,
Хъфин са азаб.
Зи чандикай амукьда пай
Рик1икай къаяб.