Шукур гъида за халикьдиз
И т1алара сагъ я лугьуз.
Са шаирдиз гаф ава ваз
Далу гайи дагъ я лугьуз.
Шерик хьана зи фикирдик,
И къелемдин гьунар сирдик.
Къуьн кутуна на шаирдик
Зид гьарай ваъ, ц1вагъ я лугьуз.
Рехъ рагарив ат1уз девран,
Хъуьтуьн къай хьиз хьана яман.
За кам вегьей са гуьлуьстан
Билбил къариб багъ я лугьуз.
Руьгь кьежириз аквазвайди,
Зи хиялда къугъвазвайди.
Виляй рик1из ргазвайди
Са булах ваъ, нагъв я лугьуз
Рик1из акваз, вилиз такваз.
Рик1е акьаз, виле такьаз,
Тек ваз чидай шаир Эйваз
Туькъуьн тийир рагъ я лугьуз.
Зи дуст Камран Къурбаналиеваз
© Copyright: Эйваз Гуьлалийрин, 2016
Свидетельство о публикации №116021610042
Свидетельство о публикации №116021610042
Рецензии