Керемрикай садни зун я

Юг гатана на и рик1е
Ви нефесдин гел тунава.
Дуьня вири вун хьиз акваз
Кьуд пад закай хъел тунава.

Килигайла чинеба ваз
Кьеж акуна хару вилел.
И накъварихъ капаш кутан
Рик1ин дава тефий чилел.

Вил алуднач ц1иргъинилай
Вун гуьгъуьна кумукьна канз.
Алатунни мич1на вилер
Ви хъен гьана амукьна канз.

Яхц1уран мах вун хьана заз,
Амай вад югъ, т1ал тахьурай.
Жуван экъуьн дегиш ая
Вил акьуна ч1ал тахьурай.

Зи ихтияр, гумач жував
Кьве вилив гва, алахьзавай.
Рик1 гатфарин жив хьанава
Рагъ т1акьуна авахьзавай.

Килигиркьван яргъарилай
Вилин нине къабар хьана.
Дагъдин марал цел атанва
Заз чилери хабар гана.

Кьакьан цава гъед хъуьрена
Алатайдаз рехъ къалуриз.
Марал вуна агь ч1угвамир
Ван хьайидан рик1 хъухъуриз.

Тек са ст1ал яд канзама,
Гьуьл кьерев кьван ац1ун патал.
Са багьна я герек тирди
Ви наздикай гат1ун патал.

Селди сувай гъайи тарар
Вац1у кьерез хкадарна.
Ваз чинеба лагьай са гаф
На алемдихъ агакьарна.

Рахада мез верц1и-верц1и
Перийрикай, Саядрикай.
За епинал хтар к1ват1на
Лезги ч1алан баядрикай.

Симерал зи т1уб экъвена
Рик1е авай ван акъудиз.
Маралди рехъ дигишарна
И тандавай чан акъудиз.

Керемакай стха кьуна,
Са цверекьди кана лугьуз.
Рагьмет гъана Межнуназ за,
Рик1икай яд хъвана лугьуз.

Т1алдин рик1ай хъвер акъудна
Квез гуз ава канибур за.
Канивилин суьгьуьрда тваз
Агудзава къенибур за.

Таран хилел цуьквер ала,
Хел цуьквервай агъуз жедач.
Лагьайт1а квез ч1алахъ жемир!
Рик1 вилервай ат1уз жедач.

Вац1ун кьерел часпар хьана,
Цацар алай симерикай.
Зи яр вац1ун а патай я
Лезет амач демерикай.

Гъалад пелел агь чугуна
Кьулан вац1ал часпар акваз.
За Аллагьдиз тел ракъана
И зул хьтин гатфар акваз.

Зун ви патав чан каниди,
Таможнадай рекье гьатна.
Азаб эхиз и дуьнядин,
Чандиз рик1ин тике гьатна.

Таможнайрин ара акван,
Къурталайни къац1анавай.
Ваз эл акван, инихъ-анихъ
Чантади къуьн ат1анавай.

Гатун цк1из жив кан хьана
Ргазвай рик1 серин ийиз.
Тек са лирли бес хьана заз
Ярдин рахун ширин ийиз.

Галтад хьана нек1егъан хьиз,
Чандикай ц1ар ччара хьана.
Лагьана заз са кайида
Лирлийрикай чара хьана.

Ашкъи къецихъ, ашкъи къене
Ашкъи рик1ин кьиле ава.
«Ваъ» лагьана, вучда кьван мад
Вири цавун гъиле ава.

Къуьлуьн кьили цуьк ахъайна,
Зи шиирдин ник1е авай.
Алцуриз лап регьат я зун,
Жуван гьалал рекье авай.

Шумуд мехъер рекье туна,
И микрафон гъиле аваз.
Чамни свас яз, кп1ардайбур,
Чеб татана к1вале аваз.

Элдин вилик шаир лугьуз
Имтагьан гуз къвез ава зун.
Ч1ехи шаир тахьайт1ани,
Михьи лезги жедат1а зун?

Цавун юкьвай рехъ кутуна,
Къушарин луж физ ава яр.
Зулун гарун аламат я
Атир мукьув гъиз ава яр.

Зун фейи рехъ ц1ал1амди туш
Кам эцигмир камарал зи.
Ашкъидикай мани лугьуз
Кьел алахмир хамарал зи.

И аямди галтадна саф
Сафун виляй аватна зун.
Са чешме хьиз ргайт1ани
Са вац1 хьана алахьна зун.

Уьмуьр физвай ащкъидин вар,
Шумуд сефер гатана за.
Валай са кам яргъа хьунни
Рик1ин ягъун, кьат1ана за.

Зи чанда са ялав гьатна,
«Лезгинка»дал хкадариз.
Вилин кири, азаб хьанва
Йифен ахвар аладариз.
    
Тавдин кьиле тават ава
Такабур гваз т1авус къуш хьиз.
Гаф лагьана, гаф хчуз жеч
Тухуда вич шагьдин руш хьиз.

Чка амач, ац1ана рик1.
Гъил къачуна гъамарилай.
Къекъвена зун шумуд рик1е
Хам алатна хамарилай.

За шиирдив вил ахъайна
Ван тахьайт1а рик1 акъвазда.
Дидедин рик1 ргай ч1авуз
Цакар гъилел тик акъвазда.

Четин рехъ я гафунин рехъ,
Шаир ят1а, к1вачел канда.
Акъат1айт1ан шуьруькьуьм гьекь,
Инсандин т1вар вичел канда.

Ашкъидин тарс яман хьана,
Рик1 ц1рана ст1ал-ст1ал.
Гьикьван хъуьтуьл рик1 авай захъ
Къван жез ава кк1ал-кк1ал.

Ашукь галай са мехъерихъ,
Аран дагъдихъ агуд ийиз.
Мани лугьур кьасарзавай
Ван хъут1удай акъуд ийиз.

Гаф къекъуьрин четин кар туш,
Рик1е т1имил гьевес канда.
Яб гайида кьабулдайвал,
Гьевесдихъни нефес канда.

Чинал са гаф, къулухъ са гаф
Ван хьайила алугда зун.
Мез иердан рик1 акурла
Гъил ченедихъ кумукьда зун.

Жуван вац1а кек виниза,
Яд амачт1ан, акадармир.
Масдан чанцел ат1ана к1ус
Жуван кьамал акъадармир.

Аллагь на зун, зурак1 касдин
Суфрадивай яргъа ая.
Эгер закай жез ават1а
Гьалал лук1раз арха ая.

Зи «бисмиллагь» хайи ч1ал я,
Шукур ийиз рахазва зун.
Алахьай хьиз, ац1ана рик1-
Гила чна, жакьвазва чун.

Рагъ акьазвай кьакьан синел,
Лекь ацукьна вичин муквал.
 Жуванда к1вач ял тавурт1а
К1вал эцигдай Шагьдин кук1вал.

Керемрикай садни зун я,
Канивилин п1ир хьанавай.
Лирлийри рик1 кьезиларда
Жувазни кваз сир хьанавай.


Зун ц1арарин хцивал хьиз,
Вун лирлийрин  верц1ивал  я.
Сад авачт1а муькуьд тахьуй,
Чун ашкъидин ч1ехивал я.

Канивилел атай зари,
Иман жагъай дили хьиз я.
Булахдин рехъ вилив хуьркьван,
Зун ятарин пили хьиз я.

И канивал азаб хьана,
За и савда кьат1ана яр.
Вучиз шаир татаб хьана,
Ви ашкъидкай гат1ана яр?

Рик1е авай ашкъидин ц1ай,
Кьве п1узарда к1ват хьанава.
Са къайи къван дуьшуьш хьана,
Зи кьил т1имил кват хьанава.

Мад уьмуьр канз арза гана,
Ашкъидикай кхьиз кан яз.
Эгер къелем хчуз хьайт1а,
И чилелай хъфиз кан яз.

Юзурайла цилци вандай
Чпир ичер илигна за.
Зулун циф хьиз ац1анавай
Хару вилиз килигна за.

Рик1е ашкъид гьава гьатна
Ц1игел-ц1игел ягъаз авай.
Вуч лугьуда ч1ал течирди,
Зи гъавурда такьаз авай.

Рик1ел ашкъид куьлег алай,
Вуна зи гьал кьат1анани?
Гьич тахьайт1а садра килиг
Вун цаварай атанани?

Рагъ дидедал хъфиз авай
Шалбуз дагъда ак1ун патал.
Заз секин йиф хуьквез авай
Вун зи рик1из хкун патал.

Ашкъидин гъуц вун хьана заз,
Т1ал хчуна рик1елай зи.
Т1вех алачир чан лацу лиф,
Алатмийир рекьелай зи.

 Харувилер ийимир заз,
Ченгидикай мах ахъайиз.
Яргъарилай кузва на зун,
Ялав галай агь ахъайиз.

Зул атана кана цуьквер,
Са цуьк ама рик1ин сала.
Рик1 ашкъидин ким хьурай ваз,
Канивилив девран гьала.

Бахтуникай арза гумир,
Шаирдин рик1 ч1ехиди я.
К1усни рехне жагъидач ваз,
Зун ашкъида михьиди я.

Ваз ахъайна за рик1ин вар,
Ана масад тадай туш яр.
Верц1и-верц1и лирли лугьур,
За ви хатур хадай туш яр.

Са сефер зи рик1ихъ элкъуьгъ,
Кьибле хьурай п1ир хьурай ваз.
Гафариз ваъ, рик1из яб це,
Ашкъи вуч я, чир хьурай ваз.

Ц1ар элкъуьрна дуьнядилай,
Экуьн ц1арц1ел акъвазна вун.
Рик1ин к1вале шагь дамардал,
Шагьвал ийиз авазва вун.

Ашкъи нефес, ашкъи гьевес
Рик1ин кани хал я тават.
Чаравили хайи уьмуьр,
Лугьуз тежер т1ал я тават.

За гъетерал йиф акъудна,
Гъил цаварив агакьдайвал.
Ракъин патал рик1 акъудда,
Экв гун патал алакьдайвал.

И мез кьуна ашкъиди пис,
Лип1 жезава, лал жезава.
Вил ахварихъ ц1игел хьана,
Тахьай хьтин гьал жезава.

За чарчардихъ чуьхвена рик1,
Пак авуна пай гуда ваз.
Ви ашкъидал ч1алахъ хьана,
Хъуьрез-хъуьрез гьай гуда ваз.

Рик1е ч1ехи ц1ай авайдаз,
Хъуьт1ерикай душман жедач.
Ярдиз вафа авай шаир,
Са ч1авузни пашман жедач.

Кам мукъаят вегьизва за,
К1вачикай чил хкатзава.
Агакь тийиз канидав гъил,
Зи рик1ин кьил акъатзава.

Ви мецин т1вал ахъа хьурай,
Рик1 п1узаррай авахьдайвал.
Ви нефесдихъ канивилин,
Бахтавар т1ал акахьдайвал.
Ашкъи кьилиз муьт1уьгъ жедач
И ц1ай яр ви рик1е канда.
Лацу чинал яру буьшме,
Рагъ хьиз к1валин пип1е канда.

Зурнедин ван япа хьурай,
"Свас авуддай" гьава ягъаз.
Яр зи рик1 ви гъапа хьурай,
Жув ашкъидин цава акваз.

Вил к1ак1 тийиз шумуд йиф я,
Кьил галатна, рик1 галатнач.
Хару вилел акур ст1ал,
Яр рик1елай гьич алатнач.

Вун масадаз гуналди яр,
Бубад ч1уру кар авуна.
Са ви рик1 ваъ, чи кьведанни
Кьведанни рик1 т1ар авуна.

Ви бубадив рахада зун,
Белки ч1алал къведат1а яр.
На дидедиз дерд ахъая,
Ам чи пата жедат1а яр.

На зи гафар къадра к1ела,
Кьуру хьурай кьеж вилерин.
Кич1е жемир я хару цуьк
Вун я зид я, я чилерин.

На бубадин мобилни лагь,
Са смс вегьидайвал.
Я тахьайт1а кьведни санал
Пад кк1айдаз хъфидайвал.

Ашкъи вуч я, чир жедайвал
Зи чешмедал илиф ая.
Канивилин шербет хъвана,
Ахпа рик1е иливара.
         
Экуьн-экуьн гафариз ша,
Рагъ ахварай аватдалди.
Яд алаха хуралай зи,
Рик1ин т1алар алатдалди.

Рагъ аватна вилериз зи,
Ваз ак1 хьана вил авур хьиз.
Гъиле ифин гьатнава зи,
Яр ви гъиле гъил акьур хьиз.

Ашкъидин ц1ал ифирда рик1,
Канивал чаз дастан жеда.
На рик1ин вар ахъаз тур яр,
Хъфин тийир мугьман жеда.

Зи рик1 ашкъид чешме я яр,
Са циб къачу яд хьурай ваз.
П1уз илисна са хуп1 ая,
Рчалдин цин дад гурай ваз.

Вун такуна кьунава мез,
Гаф жез амач ч1ун галачиз.
Чан каниди, амай уьмуьр
Герек туш заз вун галачиз.

Дагъдин хурай рехъ ат1ана
Зун кук1ушрив агатнава.
Къурбан тирда рик1 ат1ана
Зун ярдивай къакъатнава.

Булахар ваъ, чан каниди
И тандавай рик1 акъвазна.
Зазни чидач вун такуна
Икьван ч1авуз гьик1 акъвазна.

Истикан туш, ам зи рик1 я,
Вун татайди к1ус хьанавай.
Ваз курсара авай хьиз хьухь,
Аквазвачни кис хьанавай.

Азрайил вун рехъди алад,
Я тахьайт1а къван гудани?
Кани ярдин чин такунмаз
Гьикьван регьят чан гудани?
Ваз пих акван рик1ел хьанвай,
Пифиннава яд алахьиз.
Хуьквез жезвач ярдин патав,
Паласадин гад акахьиз

Я марвардин ц1уьк хьтин яр,
Зун ви рик1ел аламани?
Сят квадарна, къайгъу авач
Туп1ал туп1ухъ галамани?

Гьик1 фида кьван ч1уькь тавуна,
Рекьел яр вун тек алат1а?
Таза к1ел хьиз заз килигиз,
Виле ашкъид экв ават1а.

Я руш, вавай цуьк канзавач,
На са верц1и лирли лагь заз.
Туп1алагъа рик1ин дафтар,
Гъариб тамир акваз-акваз
 
Цуькведи чаз цуьк гузава,
Хайи чилин хатур галай.
Я руш за ваз рик1 гузава,
Канивилин атир галай.

Бейхабардиз хуькведа зун,
Таможнада ак1анава.
На симерай ван акъуда,
Яр зи рик1ни ац1анава.

Кьве сят хьана «вадминутка»,
Залумри эл рекьизава.
Мецеллайди тек ви т1вар я,
Лирли са ваз кхьизава.

Таза туп1ар вергед куда,
Минет я ваз афарармир.
Экуьн-экуьн булахдал ша,
Я руш на заз тапарармир.

Дили рик1ин дараматда,
Ялав туна хъфена яр
Ви ч1урнавай пел акуна,
Гьик1 акъвазда текьена яр.

Вазни гуда вах лагьай руш,
Зи нубатдин ктабрикай.
Чир жедайвал ашукьбурун,
Рик1е авай азабрикай.

Канивилин т1ал верц1и я,
Кьил къекъвена, экъвез ама.
Заз винелай, эхь лагьана,
Зи рик1 гьеле кьеч1ез ама.

Чан гафунихъ ц1игел чандин,
Аста -аста чан акъудна.
Чан хчункай багьна кьуна,
Ярди гъилер зав агудна.

На гьак1 рик1яй эвера яр,
Ви патавай гьай гуда ваз.
Цаву турт1а и мукьвара,
Къизилдин цеп пай гуда ваз.

"Угь" авурт1а, жеда вавай,
Мани жува туьк1уьр ая.
Жуван ц1арар верц1и жеда,
Зи рик1е рагъ куьк1уьр ая.

Заз тахьайт1а шеда лагьай,
Зи уьмуьрдиз къведа лагьай,
Икьван хъсан яр жедани,
Кьведни санал жеда лагьай.

Вун галачиз гатфар аван?
Яр яргъавай фагъир я зун.
Ви ашкъидиз муьт1уьгъ хьана,
Кабаб хьайи шаир я зун.

Икьван пара чан лагьана,
Зун вал пара вердишармир.
Атана фей дуьня лугьуз,
Зун масадав дигишармир.

Марвар цуьквер къвал-къвалава,
Канивилин сувар я яр.
Ви бубади эхь лагьана,
Зибур рик1ин гафар я яр.

За чардах ваъ, к1вал эцигда,
Дуьня рик1 хьиз ген хьурай чаз..
Ваз яйлух ваъ туп1ал гъида,
Рик1 ашкъидин гъен хьурай чаз.

На вучзава ксана яр,
Яр авай руш ксудай туш.
Накъвар вуна гарув це руш,
Цавукай муд ат1удай туш.

Муьгьуьбатди галтадарна,
Рик1е ашкъид звал хьана яр.
Заз тек са вун кан я лугьуз,
Къуншид рушар къал хьана яр.

Вун мехъеркай рахаз акур,
Чандай фейи зуз акван ваз.
Ви дердина кабаб хьана,
Кармаш хьанвай п1уз акван ваз.

Агъзур нехиш гана чилиз,
Марвар цуьквер аламат я.
Вун галачиз физвай уьмуьр,
Заз рик1ин к1ус, къазамат я.

Зурзалаг хьиз гьахьна рик1е,
Галтад жезма и тан гьеле.
Вилин кири агь хьана хьи,
К1евиз кьунва зи чан гъиле.

Агъзур тават ц1иргъина хьуй,
Яр тек са ви т1вар кьада за.
Мад дуьнядиз хуьквез хьайт1а,
Тек са вакай яр кьада за.

Лугьуз тахьай гафари зи,
Рик1е чара ванзава яр.
Ваз лирлидив лугьун гила,
Заз вун пара канзава яр.

Рик1из куьлег ягъайт1ани,
Яр рик1елай алатдай туш.
Чанда гьатай ашкъидин т1ем,
Гьич хиялдай акъатдай туш.

Рик1 ац1айла, яд хьана т1ал,
Ст1ал-ст1ал виляй къведа.
Ч1алахъ туш зун, тапарарин,
Зи канидан гъиляй къведа.

Яран сувар атана яр,
Яран паяр ракъуда за.
Эгер вуна ваъ лагьайт1а,
Вакай мад вил ат1уда за.
 
Кьакьан пелел къе чи т1варц1ей,
Къуша шемер куда за яр.
Тек са сефер чан лагьайт1а,
Садакьаяр гуда за яр.

Са т1имил кьван пел ахъая,
Заз и дуьня алахьдайвал.
Таза гъиляй са хуп1 яд це,
Рик1ин кьилел алахдайвал.

Зи чанда ви т1ал ава яр,
И лирлийрив агуд тежер.
Ирид п1ирел тухванват1ани,
Цаваривай акъуд тежер.

Рехъ алатна Шалбуз багъда,
Чархарилай циф атайла.
Ви лирлияр туп1алагъиз
Ахвар амач йиф атайла.

Зи рик1икай ц1ук1 къачуна,
Кайибуруз пай ая яр.
Тек са сефер канда лагь заз,
Яр авайдаз тай ая яр.

Ви камара кам эцигна,
Вил илисна гелерал за.
Зи дидедин свас хьайит1а,
Хуьда вун и гъилерал за.

Канивилин гъуц хьайидаз,
Зурак1дакай арха тахьуй.
Мад я дустар и дуьнядал,
Ярдивай яр яргъа тахьуй.

Ярдивай яр яргъа тахьуй,
Рик1е ашкъид сел хьанавай.
Яру хъуьхъвел куь ст1алри
Кьац1 ат1ана гел хьанавай.
 
Кьац1 ат1ана гел хьанавай,
Ярдин хъуьхъвен инад аку.
Пелеш -пелеш яргъаравай,
Зун кани тир, зи сад аку.
 
Зун кани тир зи сад аку,
Т1вех алачир лиф хьтинди.
Ац1ай вацра экв гузавай,
Ашкъи ац1ай йиф хьтинди.

Ашкъи ац1ай йиф хьтинди,
Ви мич1ерин экв жеда зун.
На булахдиз мурад лагь яр,
Кич1е жемир тек къведа зун.
 
Кич1е жемир тек къведа зун,
Ашкъи ац1ай са рик1 кьуна.
А дуьнядиз физ жедай туш
Яр яргъара гъариб туна.

Яр яргъара гъариб туна,
Ашукьдин рик1 шад жедани?
Мад канидав агакь тавур,
Икьван залум гад жедани?

Икьван залум гад жедани,
Мурадрини мур кьунавай.
Зи яр къведай жигъир аку,
Эч1ел гъана ч1ур кьунавай.

Рик1 ашкъидин ким авурдахъ,
Дустар вири къекъвез ама.
Лугьуз ава, шаир чпиз
Дили хьункай кч1ез ава.

Ахъайин за квез рик1ин сир,
Рик1е гафар бул я дустар.
Мад яр кьадай ният авач,
Лирли лугьун т1ул я дустар.

Кич1е жемир, я стхаяр
Зун Керем тир жегьил ч1авуз.
Зи фир-тефир сал хьанавай,
Са рехъ амаз вили цавуз.

Ашкъи гатфар нубар ят1ан,
Зулуз кана зун гуьзелри.
Зурзалагдин кар авуна
Заз чинеба и гъезелри.