(Туьркиедин Кирне хуьруьнви, зи дуст
Режеп Гуьвеназ)
Заманадин юргъа шивди
Ялна яргъариз.
К1еви хьана бахтунин вил,
Гьална яргъариз.
Къаяр, селер хьана яман,
Квахьна атай гел.
Чара чилел туьк1уьрна муг,
Т1ал хьана рик1ел.
Гьикьван ч1авуз, лип1 хьана мез
Акъат тийиз ван.
Кьиникьни са азаб хьана
Хкат тийиз чан.
Садаз Шагьдин мур кан хьанай,
Эцигиз хурал.
Садаз капаш накьв кан хьанай,
Алахдай сурал.
Виш йисар я,Туьркияда
Кутунва хуьрер.
Мелгьам кьуна Дидедин ч1ал,
Сагъ хъийиз херер.
Ч1ал иман яз, Ватан кьибле,
Сад-садаз арха.
Имтигьан я, ч1алан вилик
Чиливай яргъа.
Цава-чиле гьат тавурт1ан
Гъарибвилин т1ал.
Куь рик1из кьий, квадар тавур
Хайи Лезги ч1ал.
Куь рик1из кьий
© Copyright: Эйваз Гуьлалийрин, 2016
Свидетельство о публикации №116021411355
Свидетельство о публикации №116021411355
Рецензии