Чи кьведан ара я

                (айгьам)

  Зи амалриз муьт1уьгъ я вун,аламат !
 Зи гафарихъ каламрихъ хьиз ягъазва.
 Вун зи къвалал архайин я,саламат,
 Малаикдин лувак квай хьиз аквазва.

Яраб вуна фикирзава сад я вун,
 Валай гъейри ахквазмач зи вилериз.
 Ваз ак| ава зи гатфарни гад я вун,
 Герек къвезмач килигун мад цуьквериз.

Етим Эмин зи калкун я чизвани?
Къийим текъвез,эциг тийиз чилерал-
Гагь Туьквезбан,гагь Тамум, гагь Назани
 Нубатдалди кьаз гьазур тир гъилерал.

 Шаирвилин пай гайибур фелекди
 Вердишбур я суьгьуьрда тваз таватар.
 Абруз чидач гьалдан хьана,гьелекдиз
 К|ват|из девлет,дуьньядин чирк-манатар

 Им чи кьведан ара я,таб к|андач заз,
Зи тахсир за хиве кьазва уьтквемдиз.
Муьгьуьбатдин вац1 хъвайибур чидач заз,
Пул к|ват|айбур аватдалда жегьнемдиз.

 И дуьньядал к|ват|нач малар-девлетар
Заз хьайиди ярар-дустар манияр.
 Невс ахъайнач,авунач за къелетар.
Фикирдаваз а дуьньядин Гьуьруьяр !