Зи дуьнядиз мукьва дуьня,
Ава дагълара.
Руьгь виниздай са ч1ехивал
Ама дагълара.
К1вач эцигай, кук1ушрин къван
П1ир я зун патал.
Цав гудзавай вац1арин ван
Сир я зун патал.
Экуьн гьава хьана дава,
Азабриз т1алдин.
Цуьквед виле рвек1-рвек1 акван,
Чигед ст1алдин!?
И ст1алрай вили цавун
Рик1 акуна заз.
«Ша гуьг» лугьуз, са шиирдин
Ник1 акуна заз.
Рагъ зи рик1ай хъуьрена шад
Кук1ушриз рехи.
Заз дагълари чин ахъайна
Гьуьрметна ч1ехи.
Дидед гъилин ц1илихъ авай
Ч1аф ихтибарна.
Къурбан тирда «ваъ» лагьанач,
Гаф ихтибарна.
Гьик1 акъатда зи чандай мад,
Кьакьанрин суьгьуьр,
Икьван иер, икьван верц1и
Ватандин суьгьуьр?
Кьакьанрин суьгьуьр
© Copyright: Эйваз Гуьлалийрин, 2016
Свидетельство о публикации №116021107258
Свидетельство о публикации №116021107258
Рецензии