Гафэлкъуьрин

Гафэлкъуьрин
(Адил Къайибханов- Эйваз Гуьлалийрин)
 
 
Адил:
 
Кьакьан пел кьван, дегьне  к1амни рик1из хуш,
Сува лекьрен ван хьайила жеда нуш.
Ст1ур акван гьар шаирдиз несиб туш
Хвеши хьана Адилаз, куьн сагъ хьурай
 
Эйваз:
 
Дигана чуьл, цуьквер авай Ст1ура,
Рик1ер авай, эквер авай Ст1ура,
Куь къуншидал мехъер алай Ст1ура
Кьезил хьана, Эйвазаз куьн сагъ хьурай.
Адил:
Шагь акунан, ваз цаварин даях тир,
Хуьр акунан, мугьман  кани, уях тир?
Хтанавай чи шаиррал ч1алах тир
Хвеши хьана Адилаз, куьн сагъ хьурай
 
Эйваз:
Адил стха, гьик1 хьурай Шагь такуна?
Навчад пелел кьил цифера акьуна.
Жанид булах, руьгь ргазваз акуна.
Кьезил хьана Эйвазаз, Куьн сагъ хьурай.
 
Адил:
Цаваравай, рехъ кьалурдай гъед хьтин,
Куьлуь кам квай, хкадардай къвед хьтин,
Билалан кар са бубад велед хьтин
Хвеши хьана Адилаз куьн сагъ хьурай
 
Эйваз:
Шаир Билал* суван ч1ехи кьвал я са,
Чешме я са, булах я са, звал я са.
Дагълара хьун, шаирдиз хуш гьал я са
Кьезил хьана Эйвазаз, Куьн сагъ хьурай.
 
Адил
 
Къив гудайди гъуьрчуьхъан я,авчи я,
Ст1ур хуьруьн садлагьай пел Навчи я.
Чипирдилай атанавай илчи я
Хвеши хьана Адилаз куьн сагъ хьурай
 
Эйваз:

Куьд к1вал амай Кьвехуьрани акьуна,
Заз Байраман* бубадин  к1вал акуна,
Чк1анвай п1ир,  зияратни авуна.
Кьезил хьана Эйвазаз Куьн сагъ хьурай
 
Адил:
Жанид булах,ам Байраман булах я,
Зияратна,талгьайт1ани ч1алах я.
Куь к1валахар пара зурба к1валах я
Хвеши хьана,Адилаз Куьн сагъ хьурай
 
Эйваз:

Куь «штатра» Далагьахъ* кваз экъвена,
Шарвилидин гелерани къекъвена.
Рик1 дагълара, гьуьл галайнихъ элкъвена
Кьезил хьана, Эйвазаз Куьн сагъ хьурай

*Ст1ур Далагь- сур ч1аван лезги шаир
*Байраман к1вал- Дагъустандин Халкьдин шаир Байрам Селимован бубадин к1вал
 
Билал Адилов- Ст1урви, шаир