Харифле С-Я

«С» - Сют

Мен сютню бир бек сюеме,
Ийнекни саууа билеме.
Сенекчик бла аш салама,
Сюрюуге да ашырама.

«Т» - Тюлкю

Тюлкючюкге бир къара,
Кёзчюклери тум къара.
Кука джанчыкъгъа ушайды,
Кеси чегетде джашайды.

«У»- Урчукъ

Амма урчукъ ийиреди,
Бизге къоллукъла этеди.
Къыш юшюмей ойнарыкъбыз,
Чанала бла учарыкъбыз.

"Къысха У"-Буу

Буу ёхтем-ёхтем атлайды,
Ач болса хансчыкъ отлайды.
Тёгерекге сакъ къарайды,
Къайгъылы болса джаллайды.


«Ф» - Фонтан

Джай иссиди шахарда,
Джууунабыз фонтанда.
Сууну чачыб ойнайбыз,
Кюле - кюле джырлайбыз.

«Х» - Харбыз

Бир уллу харбыз кесгенме,
Тенглериме юлешгенме.
Ашайыкъ да , тояыкъ,
Сора, энтда ойнайыкъ.

Ц хариф

Цып, цып, цып деб чакъырама,
Джюджеклеге аш атама.
Джюйюлдей мыллык атадыла,
Нартюкчюк, будай ашайдыла.

«Ч» - Чыпчыкъ

Джаз алада чыпчыкъла,
Къууанчларын ачыкълай,
Ариучукъ джырлайдыла,
Бизге кёл саладыла.

«Ш» - Шаптал

Учууукъгъа олтуруб,
Уучуму толтуруб,
Ары-бери учама,
Шапталланы ашайма.

«Щ»- Щ хариф

Шапталны сюе эсенг,
Ш-харифны биле эсенг,
Къошакъчыкъ саллыкъса,
Мени да джазарыкъса.

«Ы» - Ышарыу

Кюнчюк бизни чакъырады,
Бизге джылы ышарады:
Чабышыгъыз, ойнагъыз,
Кюннге джырла джырлагъыз.

«Э» - Эчки

Эки ариу эчкичик,
Эки татлы нёгерчик,
Ойнай – кюле отлайдыла,
Эгизлеге ушайдыла.

«Ю» -Юй

Бу юйчюкде ким джашайды?
Терезеден ким къарайды?
Джигитледиле джашла,
Ючюсюда – къарнашла.

"Ъ" бла "Ь" белги.

Биз сейир харифчиклебиз,
Таушсуз тура билебиз.
Башхалагъа къошулабыз,
Джумушакъ, къаты болабыз. 

"Я" хариф

Танышсакъ деб бек излейме,
Сёз ичинде кёб тюбейме:
Мияладан пиялада,
Илячинде, къаялада.