Марфань шиц

Марфа съргозсь – стясь ни зарясь,
Эряздоне щась и карясь,
Афи штазе рямшаф шаманц,
Ладясь шобдавань программанц:
Эши лангста ведня кандомс
И жуватать симдемс-андомс,
Меле уштомс, панемс-пидемс,
Андомс идензон и мирденц,
Шаванятне-месне штамат,
Покодемань тевс срхкама.
Тяста-тоста тевнят мувихть…
Дяряй авань тефне луввихть!
Эздост пефтома кудъёткса –
Ваймонь таргамс аяш ётка.
Штоба пингть стак аф имафнемс,
Толня пянакуду яфодсь;
Коське пенгятне юрназевсть –
Кельме кудти лямбе казихть.
Ведьс тусь Марфа цють аф ласькозь,
Эши лангса ават васьфтезь.
Марфа аклянц каршес арась,
Ононц азондома кармась.
(Вень кувалмошка ульсь оноц,
Кода инжикс сашендсь овоц).
Меле шназе аля кумонц.
Ёрась пандомс ярмак шумонц,
Фатясь – лакомкац ульсь кудса;
Шитнень Пятрути лувсь сурса.
Сялдсь суседонц кержи ширде,
Нъльне сюдось ашезь кирде.
Ламос лаборкшнесь сон тяфта –
Кати част, а кати кафта.


   …Марфань куду вятьсы киц,
Моли тевда пяшксе шиц.
Шятнесь лякозь, шольдердсь ведсь,
Васедсь вяжац – сянди педсь.
Шнась сапонянц и руцянц,
Лятфтась верозай учанц.
(Цебярь ушеткс корхнемс мусь).
Тяда меле кизефкст тусть:
Вяжяй, мезьса сярятькстсь Татю?
Вяжяй, мезе раштась Матю?
Кинди азсть кистингас латта?
Кинди рьвакс лиссь Илють Ната?
Тусь ли мялезт ётай базарсь?
Менди рамайть атя казать?
Кода пидемс шову боза?
Мзяра комля кайсихть тоза?
Коста тялось лофнень канды?
Мезе учи эсот ванды,
Кда онцтот няят ярмакт,
Корхтайхть, пичедема кармат?
Мезе азомс пупордамста?
Кона шири сельгомс прамста?
Ёрась нинге максомс кизефкст,
Аньцек вяжяц эздост сизесь.


   …Марфа куду ведня ласьфтсь.
Ваность, мезе кудса васьфтсь:
Явась пянакудсь кунара,
Вяшкозь вармась сай турбава.
Шудесь парьнястонза шапакссь,
Пурьхцоц ланганза кяльсь-тапась.
Ёмлась аварди нюрямса
(Кальдяв удомс начка щамса),
Оцюсь сонцень тевонц содась:
Куду вазшка пиненц нолдась,
Ёрдась инголенза катонц –
Тяфта тонафтсь нумол сатомс.
Тувось пирьфса караф карай,
Апак потяк траксоц парай.
Мирдец фермаста сась – сизесь,
Учи, мезе полац пидесь.
Ащи Марфака мъргаса,
Касомть ангоряй сурбряса…


Да, аф пяшкодеви мяльсь,
Къда пяк кувака кяльсь.