Ваймонь энялькс

Кулемасте, ломатть!
                Кулемасть, мезь азан
(Ваймось веши эздон
                тяфта – аф лиякс!):
Ёран сявомс Модать
                лямбе кядьгучказон –
Кеподемс Шить каршес
                аньцек шачф иднякс.


Пяшкодемс тя эняльксть
                аф аньцек аш кода,
Пяшкодемс тя эняльксть,
                азса видеть, пелькс:
Вишкомф киви пиземсь
                сыияфты Модать,
Лама вастса палы
                ронгонц лангса вельхкссь.


Эрьдовасте, ломатть,
                аруяфтсаськ содуть,
Кяженьконь тюфатьсаськ, –
                пей алу люпштафть, –
Модати путтама
                коволста прялкс-тоду,
Лангозонза – вельхкскя
                панчфонь котфста стаф.


Тясте юксне: Модась –
                тейнек эрям васта,
Менель тяшттнень ёткса
                сон нюрям вастс итьф.
Кородость-ужяльдесть,
                кельгость Тядя-масторть,
Тяда канне сярятьф,
                кадость касфты итть.