Ялгаксшиньмеквайгяль

Мон илядан вели,
               ялгане туйхть ошу.
Тячи кисна ширен
               мекольцеда шарсь.
Саднязон суваме,
               пялес шобда кошу
Марень пизем шовор
               пуромоме марс.


Корхтамати ушеткс
               стака ульсь уставамс,
Визди сельмованфне
               модас эскокс пезсть.
Зепсонк кантф винанять
               кашт аф молезь явоськ, –
Муворшиньке ляпомсь:
               эсь паньфкясь, нать, лездсь.


Ваймонь кенкшне панжевсть,
              «ляпе кожф» уфазевсь,
Цють аф сельмоведю
               кътморямат ульсть.
Ковнясь менель тёкшсса
               тяштензон уфазень,
Ся веть лама мора
               сетьмоф цёфксне кульсть.


Лафтува-къргава
               кядь лапаньке курькснесть,
Мокшенданьке мяштти
               виденцямат шавсть.
Зарянь стяма шовор
               эряфть сюцезь-уркстозь,
Ялгаксшити кемазь,
               кяттне кядьста явсть.


Ялгане тусть ошу
               мон илядонь вели, –
Кажнайть шкайгиц сонцень,
                кажнайсь тевс кундась, –
Синь заводсь примазень,
                тейне – пакся кели;
Карксэземге тише
                кенерьфтась лугась.


Эрь илядня станяк
                шобдать ёткс ковсь эци,
Тяштенянь штатолнят
                варьхмодемс пълхтай.
Ялгань виденцямать
                меквайгялец тячемс
Марлюкс алга юрги,
                садняван лътай.



Саднясон монь станяк
                моли марень пизем,
Ширемф кошканц вельхксса
                сетьмоть колси цёфкссь…
Эряфонь ки рашкса
                ялгань учезь сизень.
Пелян, синь юкставихть
                кода сире ёфкс.