Джюрекден джюрекге джол къысхады -
Бир къарам, бир сезим, бир умут.
Сюймеклик джюрекге ашыгъады,
Тынчлыкълы кюнлени сен унут.
Кечени джукъусуз ашыраса,
Сагъышла къаланыб башынга.
Джюрекни амалын джашыраса,
Амалсыз ышара тышына.
Кёзюнге бир сейир кёрюнеди,
Тёгерек тюрленибми къалды?
Керексизми эсинг бёлюнеди?
Сюймеклик эсингими алды?
Халынгы англаргъа кюрешсенг да,
Соруула джуабсыз къалырла.
Джазыуну алдаргъа излесенг да,
Джюрекле бир-бирин танырла.
Джюрекден джюрекге джол къысхады
© Copyright: Айшат Кущетерова, 2016
Свидетельство о публикации №116010906855
Свидетельство о публикации №116010906855
Рецензии