Ц1айлапанар рахадайла кьакьанра,
Михьи шагьвар къугъдайла аск1анра,
Адалатдин икърар хьайла майданра
Секин жезва зи танда рик1 са к1ус кьван.
Чубарукар чи ч1ередик хтайла,
Тама жейран бала галаз катайла,
Накьвадикай гатфарин ни атайла
Секин жезва зи танда рик1 са к1ус кьван.
Ц1ийи ч1урар хкатдамаз чиликай,
Мердимазар алатдамаз виликай,
К1ани ярдин за кьадамаз гъиликай
Секин жезва зи танда рик1 са к1ус кьван.
Майвадин тар майва алаз акурла,
Кесибдин к1вал шурва аваз акурла,
Хьран к1аник гурва галаз акурла
Секин жезва зи танда рик1 са к1ус кьван.
Каспидилай хкаж жезва яру рагъ,
Кьегьал хва хьиз акъвазнава чи Шагьдагъ,
Экв-ярарив галчуд жезва ина багъ
Секин жезва зи танда рик1 са к1ус кьван.
Секинвал
© Copyright: Шахмардан Арран, 2015
Свидетельство о публикации №115121606914
Свидетельство о публикации №115121606914
Рецензии