Огь неш, ну хъа урхIаврус

Хъа хIаврус ну, хъа хIаврус,
Огь неш, ну хъа урхIаврус…
Рурсбани уцилевус,
Хъа угьес гьалак хIавкIус…

Ну цIакьле жагьле цайра,
Хъа угьес хIайгахъисра…
Ухънале ну каркусра,
Амма ну хъа хIаврусра!

РукIулерар неш аман,
Хъа угьес биркур иле,
Хьарзаб дугьайкем гьаман,
Хъули чукьиркен иле.

Хъумартен рукIар рурсбе,
ХIу иргIяхъес дигахъуй…
- «Аркьуледар барумбе,
Мурт цайри хIу хъа уруй?»

- Керрерхон неш намзакан,
Хъа угьес нам хIайгахъис…
Дахъ рурсбе леб алавкан,
БукIуй намзе «дигахъис»…

Це рариша нам хьунул,
Дахъол рурсбе лебхIале…
Агорачи дия хьул,
Хьунул арасес иле.

Гьачам хьарзаб дугьайкем,
Хъули ну дурайкира…
Кьяшме хъайзе ацIайкем,
Ца рурси кераира…

Нешли вярариле их,
Дичу тянишругьахъес…
ХIабалас цебугьубил
БехIбихьиб уркIи бузес…

ХIябра жегойра лери,
ХIулбе дишхъес урхIаврус…
Неш, хIатI хугил баркала,
Ишике ну хъа урус…

Неш, вябара адамле,
БирахIа жинра хъярхъле…
ДукахIа ва дужахIа,
Шатра дурахIа цIакьле…

Хъа урус ну, хъа урус,
Шадикайкем ну ужус,
ХIулукIуле ну уус,
Абзализе ну улхъус…

АртIая нам хIяракьи,
БицIайкем гьей тямягъи,
Жин цаб дия ишбари,
Агорбарая гъяйгъи.