К1ел гьалмагъ

Кьяшми кункил г1ярара
Занзбала мах кьядгара
Севан гьалмагъдикибал
Х1ушаб хабар бурулра.

Ч1янк1личиб дуц1бик1ули,
Г1ярала дурх1я бамсур,
Вац1а умц1урси бец1ван,
Пакьир майали батур.

Нешли махбарили саб
Гьар барх1и дуц1бик1ахъес,
Халабаибх1ели ил
Нешгъуна бетаахъес.

Эмх1ела чедибад ил
Т1ях1бухъес биуб кьалли!
Х1ябк1ап1ила х1ярлизиб
Бугули саби кьарли.

Гьав ахъбуцес, дях1 дирцес
Г1инизличи гъамбиуб,
К1ач1убачи бикили,
Шинни бужес г1яшбиуб.

Г1инизла дях1имц1айзиб
Сунна сурат чебаиб.
Саби биъни х1ебагьур,
Илизи малх1ямли иб:

- Халати далк1а х1улбар,
Эмх1елагъунти лих1бар,
Бамбагъунти кач1убар,
Х1у чири, дила бузи?

Къаркъаличи т1ашбизур,
Х1яйна ахъли т1ях1бухъун,
Г1инзибси суратлизи
Ил сунечи гапбухъун:

- Хъунц1бар бец1лизибад ну
Ах1енра урухк1ули,
Се барилихьалли, наб
Ах1ен ил г1еббиули!

Г1инизла мякьлаб г1яра
Делхълизира бетухъун.
Г1инизлабси суратра
Кункли делхъли кабухъун.

Г1ярала дурх1яли илис
Балк1а х1ули линк1бариб.
Дях1имц1айзибсилира
Ил уюн тикрарбариб.

- Пешкешлара лебри х1у,
Баши, тянишдирех1е!
Т1умала ч1янк1 баладу?
Илаб х1язра бирех1е.

Ил замана г1елабад
Гъамбирулри гушси бец1.
Бех1 гумлачиб башули,
Биуб ил г1ярачи кец.

Шутри т1ут1удик1улри
Мух1лиларад хъунц1барла.
Кьац1бики, хъянт1а буцес
Кьас сабригу лих1барла.

Сунела суратличил
Гъайбик1уси г1яралис
Бец1ли бирул х1иллала
Хабар аги гьачамлис.

Г1еларти кьяшмачиб ил,
Т1ашбизурли, ч1икьбит1ун,
Гьаларти к1елра кач1а,
Заклизидях1 гьадатур.

«Г1яра бикиб» бик1уси
Бец1ла х1ер шалабиуб,
Житаван ц1уц1биубли,
Т1ях1бухъес х1ядурбиуб.

Мях1яулла удибад
Х1ербик1уси кьядгали,
Бец1ли г1ярас бируси
Сабригу чебиули.

Бец1ла уюнтачи ил
Урк1илаб дукарк1улри.
«Балтахъис х1ези нуни»,-
Ил сунези бик1улри.

Х1ули лип1ла манзиллис
Кьядга кьанбиаллири,
Пакьир г1ярала дурх1я
Ганжубази бикилри!

Кьадаубад кьядгали
Х1екьли ахъли хъех1бушиб.
Урк1бухъунси г1ярали
Ч1янк1личидях1 т1ивхьдатур.

Хъунц1барра т1ях1бухъунгу,
Амма селра х1ебикиб.
Х1ербик1уси кьядгала
Дукелц1и дурадикиб.

«Агь, итгъуна, ишгъуна!»-
Кьядгалис вайти дуриб.
Цулби кьябцардирули,
Вац1лизибях1 бебшиб.

«Г1ярала дурх1я бергес
Сабигу балбизурли!
Къачагъ саби, иргъх1ергъу
Се буралра  хъунц1барли,-

Хъутурбик1ули, кьядга
Арбякьун пукьализи,
Г1яралис бетаурси
Хабар бурес дурх1нази.

Г1ярала дурх1я бак1иб
Ши бужес г1урра г1инзи.
Цугбикиб илаб кьядга.
Г1яра бик1ар илизи:

- Баркалла, зизи кьядга,
Х1уни ну берцахъира.
Бец1ли х1ед се барибал
Наб багьес дигахъира.

- Бузи г1яра, хъунц1бар наб
Ах1енгу урехила.
Макрула кур гурда саб,
Бурасли, душман дила.

Дилак1ун х1елагъунти
Кункти кьяшми агара,
Душмайзи балтахъуси
Нук1ун занзбани сабра.

- Х1елаван дугал занзби
Агарагу дилара,
Хъунц1бар урухбирайчил
Гьалмагъбикес дигулра.

Илбагьандан сар бик1ар
Илди гьалмагъдикибти:
Кьяшми кункси г1ярара
Занзбала мах кьядгара.