Расул Гамзатов на табасаранском

                Расул ГЬЯМЗАТОВ


«Старый стрелок я…»

       * * *
Кьаби хюрчабан вуза,
   хъа гаф – йиз хюрч.
Тюфенг гъибисза,
   гьебгну- хюрч, дабгну урч.
Дюппе-дюз гаф хълибгний-
   куркIнийиз улар,
Ва гъудургний
   гъерццу чIеэрихъ шилар.

Аьмалдар гаф,
   пIакьнахъди даруб таниш,
Шули айиб
   чаз ккунибси яшамиш,
ГьитIибкIну а
   дагълариъна яркврариъ,
Йиз кьалмин кIакIнаккан
   ккутIубччвну гьебгри.






            

    Ифи ва нивгъар («Кровь и слёзы»)

Зийниан ифи рубзури а, амма
Саб нивкьана ктабхъурадар.
Дагълужвуван къанун ву му даима:
Багьа ву ифитIан нивгъар.
Фу жви ву думу, гьаци дарш? 






«Я порой один бреду по свету»

1-ый вариант переводв:
        * * *
Ялгъузди айиган ярхла рякъ-хулиъ,
ЮкIв дипуз шлу инсанар хъадру вахтна,
Йиз ккуни шаирар багахь уч шули,
Ади шулза дурарихъди сюгьбатнаъ.

Хъа учву – гаф гьисабнаъ адрудари -
Наънан гъадабгъури шулучва кьувват,
Ялгъузвал гьял апIуз язи юрдариъ,
Гъагъи рякъяр духьнайган учвуз кьисмат?


2-ой вариант переводв:
        * * *
Ялгъузди уьргъри шулзу му дюн`яйиъ,
Сар каскьана хьтарди багагь юкIв дипуз.
Йиз ккуни шаирар гьациб арайиъ
Гъюрзухьна сакитвалиъ гаф-чIал апIуз.

Хъа учву – гаф гьисабнаъ адрудари -
Наънан гъадабгъури шулучва кьувват,
Ичв ялгъузвал аьгь апIуз дар юрдариъ,
Гъагъи дюшюшдиъ айи вахтна кьисмат?








        Кьарнийир («Журавли»)


Вахт-вахтарик гьаци вуйиси шулиз –
Ифдин женгариан дарфи эскрар
ИлтIикIнайиси лизи кьарнийириз,
Ругарик кивну адруси дурар.

                Дурар гьадму вахтариан гьамусдиз
                ТIирхура, ухьуз дихар апIури.
                Гьаддиз дарин кми-кмиди ва пашманди
                Ухьу лал хьувал,  завуз лигури.

ТIибхури а дурнйирин цIар, эбгнайи,
ТIибхури а дифрягъ хябяхъ вахтна.
Белки, вушул думу узуз гъибтнайиб
Саб бицIи йишв, айиб гьадму цIарнаъ.

                Сад йигъ гъиди – мучIу жангар рангаригъ
                ТIирхидиза цIарнаъ кьарнийирин.
                Завариан ничхриси дих апIури
                Учвуз вардиз, гъуздариз жилиин.

Вахт-вахтарик гьаци вуйиси шулиз –
Ифдин женгариан дарфи эскрар
ИлтIикIнайиси лизи кьарнийириз,
Ругарик кивну адруси дурар.


                Табасаран чIалназ илтIикIур
                Эльмира Аьшурбегова