Са ахвар
Заз са ахвар акуна къе,
Гур гъенеллай - кьенавай зун,
Вяде хьана, гьатна рекье
А дуьнядиз фенавай зун.
Руьгьдиз цавай аквазвай зи
Са бязибур тушир чIалахъ,
Са бязиди жезвай рази:
«Куьруь уьмуьр хьана адахъ…»
Килигзава зун кьуд патахъ,-
Гьинва багъри, гьинва вахар?
Авачни са шедайди захъ,
Куь кIан хьунар тирни махар?
Вужар ятIа кIвалевайбур?
ЧIижерал хьиз алатна ван,
Амачни квехъ гьая- абур?
Куь рикIикай хьанвани къван?
Элкъвез ала чIулав къушар,
ЧIулавбурун сувар я жал?
Бес гьинватIа яраб рушар,
Авачни куь рикIера тIал?
Эгь, азиз дуст, дуьня кьуна
Акъваз жедач - рекьин я гьахъ.
Фин, амма хуш гелер туна,
Са шедайди жедайвал чахъ…
Са ахвар
© Copyright: Билал Адилов, 2015
Свидетельство о публикации №115061410126
Свидетельство о публикации №115061410126
Рецензии