***

21 апрель. Зи играми дидедин экуь къаматдиз

Диде,катиз физва вахтар,
Ингье ц1уд йис хьанва кьадар,
Вун галачиз….  Чанда рик1 хьухь-
Тагькимарнай квачиз ажугъ.

За, азизди,къвемир ваз хъел.
Алцумзавач сурара гел,
Муьт1уьгъариз жезвач к1вачер,
К1андач рик1из къайи къванер.

Дарих хьана, гудайла гуж,
Хкажда кьил вили цавуз,
Вилив хуьда лифер жерге,
Зи лацу лиф авай к1венк1ве.

Хкягъа зи к1валин ч1ере,
Рангарин луж шумуд жуьре,
Зи дах,халу ,бадеяр кьвед,
Ч1ехи буба Багьа, Агьмед.

Халаярни, эмеярни,
Имиярни,амлеярни,
Вили, рехи, какахьайбур,
Ц1ару, т1имил алахьайбур,
Лиферин луж лап еке я,
К1венк1вевайди зи диде я.

Зи лацу лиф, азиз диде,
Ша, рахан чун,ацукь легьзе,
Ийидач мад дерди-бала,
Зи дертни гъам гудач к1ула,
Ислягьвилин ярж я лифер,
Лув це, хьуй ваз хъсан сефер!

Душманри мад хкажна кьил,
Телеф жезва жегьил ,агьил
Тамарзу я ислягьвилихъ,
Бубайрин кар вегьеч к1вачик
Гъалиб жеда!-къаст я к1еви ,
Лув це, зи лиф,цава вили!
                Апрель 2025

       Лацу лиф

Диде! Диде!...Азиз,ширин, масанди!
Къакъудна вун пис азарди,бамишна!
Апрелдин варз.Къанни сад.Югъ так1анди,
Диде, ви чан мич1и суруз багъишна.

Аян тир ваз, зи азизди, масанди,
Яргъал рекьиз гьазур хьанвай,элкъвена
Хквен тийир! Гьик1 азарди-яманди,
Инсаф течир ви винел сас регъвена?...

Чаз, балайриз , алт1ушай вал ч1ижер хьиз,
На сефилвал къалурначир. Чинал хъвер
Гъиз гужунал, гъилералди кинериз,
«Хажалатмир» лугьуз акьална вилер.

Шехьзава чун вили накъвад ,азизди,
Дарман-дава жагъанач, хьанач чара,
Начагъвили авунвайт1ан ажизди,
Кьабулзавач рик1и чи вун хьун сура!...

Диде чан,вун амачир югъ алукьна...
Чи гьаятда са лацу лиф ацукьна,
Такабурлуз яваш ериш къекъвена,
Лиф лув гана чи к1валерлай элкъвена.

Ак1 я хьи чаз, диде вун я хтайди,
Лацу лиф яз, чахъ гьамиша галайди,
Азиз диде, ви к1анивал дерин я,
Лиф ви руьгь я, вун чахъ гала, якъин я!
                30/04  2015                p.s. Гьакъикъатдани диде кучукай пакадин юкъуз чи варце дуьадал акъвазнавай итимрин арадал лув гана са лацу лиф ацукьна. Яваш еришдин адан къекъуьнар акур зи стхади лиф гъилел кьуна, кап алтадна, к1вализ хкана" Бах хтана" лагьана...Вилик вегьей къуьлуьн твардиз к1уф яна лифре са герендилай ахъа пенжердай лув гана.