Неш ребкIиб, кьанугьури хIу урши

Уркулзе горирулри нешли урши,
ХIулрукIуле., хъуммарта ну рукIуле.
Гьар цуния вахтилзе булхъан тIурши,
Уиб нешла урши хуги игъуле.

Някь буциле урши школзе арукиб
Лебил вайил пикри нешли гьабахъиб.
Заман жявле аркьян… их хугивягъиб,
Школа бегъуле… учIес их вяхIяриб.

Университет таман бариле гIур,
ГIярмиялизе арякьун их урши.
Нешис хIябра цIакьле урши гьаниркур,
Уршилис биргъу арц, лебкIара гаши.

Аллагьизе тиладирукIар жан неш…
«Дия урши хIуликахъагъа иле.
Хугина бакIалера намке цIахдеш,
Ну цIахрурус, урши цIах майри иле».

Уршилис жин бариб, урши хъавариб,
Итирагъа уршили неш леракIиб.
Цуния яшавке урши хъямукIиб,
Гъулухъ бирибил неш, гьанриркхIариркиб.

Рухъна неш ратун уркIецIи аголе,
Цай хугивагъяхъибил хъум артува.
Неш регIел руар гьаннара рулгуле,
Калъэн гIяхIле, арукьалра ратува…

Неш ребкIиб, адамлани хIяре рихьиб,
Уршилике их хабар вайил бягъиб.
Их уршилис лерилра гьадидакIиб,
ПIайбируле цIелда, исес вехIихьиб…

Нешла хъули вакIиб, унза гьаргбариб,
ГIянияла уди ца явлухъ баргиб.
Гьаргбариле тIариб, духIна арц даргиб.
Арцла мякьзе нешла белкIла баргиб.

Нешли белкIлализе руиб белкIува:
-Ишти арц цар, нуни хIатI чукьдяхъибил.
РатунрикIара ну неш хъумартува,
ЯцIал дусли рузуле хIатI дарибил.

БелчIува, урши цIакьле кьакьавакIиб,
Уршили ихцада арц ца балзе дириб.
ЧIечIа дариле арц, цIакьле чIугъукIиб,
Цунени неш леракIибил гьади бакIиб.

Исиб хIулбазела шин шяп дегъойкем,
Нургъбала мелизе хIи дашандугьайкем.
Амма чарбурхIабурар арбякьунил,
Урши цайри иха гIяйпла калъунил.

Гьанна неш агора, руциб цIяб хIябли,
Гьанна хIура левикIу хIа дурхIнани.
Неш руцIибхIале хугина гъяйгъили,
ТIарес нешике гъяйгъи хIабарри хIуни.